Ո՞վ է գցել պարային խմբերի փողերը, կամ՝ ո՞վ՝ ո՞ւմ է «գցել», ու որքա՞ն. ո՞ւր են նայում իրավապահները
Օրեր առաջ 168.am-ն անդրադարձել էր հանրապետությունում գործող մի շարք պարային համույթների ղեկավարների ահազանգին, համաձայն որի՝ ոմն Արմանդո Ղուկասյանի քայլերի արդյունքում իրենք խաբեության զոհ են դարձել։ «Ո՞վ է «գցել» պարային խմբերի փողերը. ես սրիկա չեմ, գիժ էլ չեմ՝ 150 եվրոյով Եվրոպայում մի շաբաթ պահեմ» վերտառությամբ հրապարակման մեջ նրանք հայտարարել էին, որ Կատարողական արվեստի համաշխարհային ասոցիացիայի նախագահ ներկայացած անձը՝ Արմանդո Ղուկասյանը, Եվրոպայում հյուրախաղեր կազմակերպելու պատրվակով գումարներ է հավաքել ու անհետացել։
Որոշ համույթներ դեսպանատներում մուտքի վիզայի մերժում ստանալուց հետո փորձել են ճշտել հրավերի իսկությունը, որին ի պատասխան՝ ստացել են փաստաթուղթ, որը հավաստում է, որ Ղուկասյանի կողմից ներկայացվածն անօրինական է ու առնչություն չունի իրենց կազմակերպության հետ։
Ինչպես խոստացել էինք՝ մենք նաև կապ ենք հաստատել Արմանդո Ղուկասյանի հետ, որը ցանկություն հայտնեց ներկայացնել իրադրության իր մեկնաբանությունը։
«Այն ամենը, ինչ ներկայացնում է Դավիթ Բաբայանը (խոսքը «Արմենիա» պարային համույթի գեղարվեստական ղեկավար Դավիթ Բաբայանի մասին է։- Ա. Ա.), բացարձակ սուտ է, ինչի համար ես դիմել եմ Հատուկ քննչական ծառայություն, քանի որ նա, առանց իմ գիտության, ամենուրեք նկարահանում է ինձ ու արատավորում իմ համբավը։ Ես տեղյակ չեմ եղել, թե ի՞նչ թիվ է պայմանավորվել Դավիթը խմբերի հետ ու գումարներն անձամբ վերցրել»,- նշում է Արմանդո Ղուկասյանը։
Նրա պնդումներին ի պատասխան՝ «Արմենիա» պարային համույթի գեղարվեստական ղեկավար Դավիթ Բաբայանը հակադարձում է՝ տեղեկացնելով, որ առկա են տեսանյութեր ու նամակագրություն, որը հավաստում է, որ ինքը վերցրել է ընդամենը մի խմբի գումարն ու փոխանցել Արմանդո Ղուկասյանին։
Շարունակելով իր պարզաբանումները՝ Արմանդո Ղուկասյանը պատճառաբանում է, որ գումարները ծախսվել են դեսպանատանն օր վերցնելու, թարգմանությունների, Վիզա կենտրոնի ու տուրիստական ընկերության ծախսերի համար։
«Իսկուհի» ՍՊԸ-ի տնօրեն Իսկուհի Գուբասարյանը հակադարձելով Ղուկասյանին՝ նշում է, որ թղթաբանական ողջ գործընթացն իրականացրել է իր գլխավորած տուրիստական ընկերությունն ու խաբվել է, քանի որ Արմանդո Ղուկասյանը վճարել է միայն 10 անձի նոտարական թարգմանության համար, մնացյալ ծախսերն այդպես էլ մնացել են չկատարված, իսկ որոշակի վճարումներ դեսպանատներում կատարել են ծնողները։
Ինչպես հայտնում է տուրիստական ընկերության տնօրենը, իրենից բացի, կան շուրջ 3-4 այլ տուրիստականներ, որոնք ևս տուժել են Ղուկասյանի գործողությունների արդյունքում։
Մեզ հետ զրուկցում Արմանդո Ղուկասյանն ու մայրը՝ Հասմիկ Էլիզբարյանը, հայտարարում էին, որ ՀՀ վաստակավոր արտիստ Սոֆի Դևոյանի որդին՝ Հովհաննես Պողոսյանն ու մի քանի այլ անձինք ապօրինաբար տիրացել են իրենց տանն ու այնտեղից դուրս են բերել իրենց պատկանող գույքը, որը Հասմիկ Էլիզբարյանը բնութագրում է՝ որպես գողություն։
Մեր դիտարկմանը, որ այնտեղ կանգնած են նաև ՆԳՆ ոստիկանության ծառայողներ, ինչպե՞ս կարող էին ոստիկանների ներկայությամբ տեղի ունենալ նմանատիպ գործողություններ, Ղուկասյանը հայտարարում է․
«Ոստիկանությունն օրենքը խախտելով՝ պաշտպանում է Պողոսյանին»։
Հասմիկ Էլիզբարյանն էլ, լրացնելով որդուն՝ հավելում է․ «Քանի որ գումարներ են տվել, ոստիկանությունն անում է այն, ինչ ուզում են»։
Այսպիսով՝ մենք ներկայացրեցինք բոլոր կողմերի տեսակետները ու, կարծում ենք՝ այլևս գնդակն իրավապահների դաշտում է։
Մանրամասները՝ տեսանյութում։
ԱՍԱՏՈՒՐ ԱՍԼԱՆՅԱՆ
