Անդրեասյան եղբայրները էկրանավորում են խորհրդային հայտնի հեքիաթը

Անդրեասյան եղբայրների կինոընկերությունը գնել է հայտնի խորհրդային հեքիաթի՝ «Վովան անդրսարյան թագավորությունում » («Вовка в Тридевятом царстве») էկրանավորման իրավունքները։ Այս մասին տեղեկանում ենք «Новости кинопроизводства» Telegram-ալիքից:

Հայտնի է, որ Անդրեասյան եղբայրները գնել են հեղինակ Վադիմ Կորոստիլյովի օրիգինալ գրքի էկրանավորման իրավունքները նրա դուստր Մարինայից։ Հեքիաթը պատմում է մի ծույլ դպրոցականի մասին, ով պատահաբար հայտնվում է կախարդական աշխարհում, որտեղ ապրում են խորհրդավոր հերոսներ։

Ըստ աղբյուրի՝ նախատեսվում է նկարահանել լիամետրաժ գեղարվեստական ֆիլմ։ Այժմ ստեղծագործական խումբը աշխատում է սցենարի վրա, որի հեղինակն է Անդրեյ Գավրիլովը։

Նկարահանումները ծրագրված են 2026 թվականին, իսկ ֆիլմի պրեմիերան սպասվում է 2027-ին։