Եմենում զոհերի թիվը հասել է 58-ի, վիրավորներինը՝ 126-ի
Եմենում զոհերի թիվը հասել է 58-ի, վիրավորներինը՝ 126-իԵմենի ալ-Հոդեյդայի առողջապահության գրասենյակը հայտնել է, որ Ռաս Իսա նավթային նավահանգստի ուղղությամբ ԱՄՆ-ի ավիահարվածների հետևանքով զոհերի թիվը հասել է 58-ի, իսկ վիրավորներինը՝ 126-ի։
Այս մասին հայտնել է հութիներին պատկանող Al Masirah հեռուստաալիքը։
Ապրիլի 17-ի ուշ երեկոյան ԱՄՆ-ի օդանավերը շուրջ 14 հարձակում են իրականացրել ալ-Հոդեյդայի նահանգում գտնվող Ռաս Իսա նավահանգստի ուղղությամբ՝ խլելով տասնյակ աշխատակիցների կյանք։
Իսլամական դիմադրության շարժումը (ՀԱՄԱՍ) դատապարտել է «ԱՄՆ օդային ագրեսիան»՝ ուղղված Ռաս Իսա նավթային նավահանգստին՝ այն բնութագրելով որպես Եմենի ինքնիշխանության կոպտագույն խախտում և պատերազմական հանցագործություն։
ԱՄՆ կենտրոնական հրամանատարության կողմից հաստատված հարվածներն ամենածանրն էին և ամենամեծ թվով զոհերի պատճառ են դարձել մարտի 15-ին ամերիկյան վարչակազմի մեկնարկած հարձակումների ընթացքում։
Ավելի վաղ հաղորդվել էր Եմենում ապրիլի 17-ին ամերիկյան հարվածներից շուրջ 40 զոհի մասին։ ԱՄՆ-ն մարտի 15-ից ի վեր շարունակում է հարձակումներ իրականացնել Եմենի վրա՝ նպատակ ունենալով վերացնել հութիների կողմից Կարմիր ծովում Իսրայելի կամ Իսրայելի հետ առնչվող նավերի վրա դրված շրջափակումը։
2023 թվականի հոկտեմբերի 7-ին Իսրայելի և ՀԱՄԱՍ-ի միջև բռնկված ռազմական գործողություններից հետո հութիները սկսել են տասնյակ հարձակումներ իրականացնել Կարմիր ծովում և Արաբական ծովում իսրայելական կամ Իսրայելի հետ առնչվող նավերի վրա՝ Եմենում իրենց վերահսկողության տակ գտնվող տարածքներից կիրառելով հրթիռներ և անօդաչու սարքեր՝ հայտարարելով, որ այդ կերպ իրենց աջակցությունն են հայտնում Պաղեստինին:
