Արցախի դեմ Ադրբեջանի ագրեսիայի արդյունքում արդեն մոտ 100 մարդ է զոհվել. Ռուբեն Վարդանյան
Արցախի դեմ Ադրբեջանի ագրեսիայի հետեւանքով զոհվել է մոտ 100 մարդ, հարյուրավոր մարդիկ վիրավորվել են։ Այս մասին Reuters-ին տված հարցազրույցում ասել է Արցախի նախկին պետնախարար Ռուբեն Վարդանյանը։
«Սա մեծ պատերազմ է. Ադրբեջանը լայնամասշտաբ գործողություն է սկսել»,- նշել է նա։
Վարդանյանի խոսքով, ադրբեջանական ուժերը շարունակել են մարտերը ողջ գիշեր։ «Արդեն հարյուրավոր մարդիկ վիրավորվել են, մոտ 100 մարդ մահացել է»,- ասաց Վարդանյանը։
«Նրանք, ըստ էության, մեզ ասում են, որ մենք պետք է հեռանանք, կամ ընդունենք, որ սա Ադրբեջանի մաս է: Ըստ էության, սա տիպիկ էթնիկ զտումների գործողություն է և պատերազմ, որում այժմ շատ խաղաղ բնակիչներ են զոհվում»,-ասել է նա:
Վարդանյանը նշել է, որ աշխարհն անտեսում է Ղարաբաղի ճակատագիրը. «Ռուսաստանը լռում է և փաստացի անտեսում է այս ամբողջ ռազմական գործողությունը։ Բայց ոչ միայն Ռուսաստանը, աշխարհը լռում է»,- ասաց Վարդանյանը։ «Ոչ ոք ոչինչ չի անում. բոլորը դա անտեսում են, Ռուսաստանը լռում է, բայց և Արևմուտքը»:
