Դանակահարություն Նիդերլանդներում․ կա զոհ և վիրավորներ

Նիդերլանդների Լեյդեն համալսարանական քաղաքում դանակահարության հետևանքով 1 մարդ մահացել է, 2-ը՝ վիրավորվել։ Այս մասին հաղորդում է Associated Press գործակալությունը։

Ըստ ոստիկանության՝ դեպքը տեղի է ունեցել եկեղեցու կողմից ղեկավարվող կենտրոնում, որտեղ գործում են անտուն մարդկանց, միգրանտներին և ապաստան հայցողներին օգնող մի շարք մարդասիրական կազմակերպություններ։ Տղամարդը մտել է կենտրոն տեղի ժամանակով առավոտյան ժամը 9։30-ին, անհայտ պատճառներով դանակահարել մարդկանց և փախուստի դիմել։

Ստացած վիրավորումներից տեղում մահացել է 66-ամյա մի տղամարդ։ Մյուս երկու վիրավորները հոսպիտալացվել են։

Բոլոր դանակահարվածները կենտրոնի աշխատակիցներ էին։

Ոստիկանությունը դիմել է հանրության օժանդակությանը կասկածյալին գտնելու հարցում, սակայն նախազգուշացրել է, որ ոչ ոք նրան չմոտենա։