«Ո՛չ Արցախի էթնիկ զտմանը» շարժման մասնակիցներն անժամկետ ակցիա են անցկացնում Ստեփանակերտ-Շուշի ճանապարհին
Արդեն 5-րդ օրն է՝ Արցախի Հանրապետությունում երիտասարդների նախաձեռնությամբ մեկնարկել է «Ո՛չ Արցախի Հանրապետության էթնիկ զտմանը» ստորագրահավաք-շարժումը, որի նպատակն է՝ վերջ դնել Ադրբեջանի կողմից իրականացվող արցախահայության էթնիկ զտմանն ու ցեղասպանական քաղաքականությանը, որին արցախահայությունը ենթարկվում է 44-օրյա պատերազմից հետո։
Այսօր շարժման երիտասարդ մասնակիցները հայտարարեցին, որ վրաններ են տեղադրում ու անժամկետ ակցիա են սկսում Ստեփանակերտ-Շուշի ճանապարհին։
Շարժման մասնակիցները տեսաուղերձով կոչ արեցին քաղաքական և ապաքաղաքական բոլոր ուժերին՝ միանալ ակցիային։
«Մենք պահանջում ենք, որպեսզի Ադրբեջանը Բերձորի միջանցքում ապօրինի տեղադրված անցակետը հեռացնի։ Մեր ակցիան այստեղ կշարունակվի այնքան ժամանակ, մինչև այս պահանջը չկատարվի»,- հայտարարեցին ակցիայի մասնակիցները։
Նշենք, որ ստորագրահավաքին հաջորդելու է դիմում-պահանջը՝ ուղղված ՄԱԿ-ի Անվտանգության խորհրդի անդամ պետություններին, ԵԱՀԿ Մինսկի խմբի անդամ երկրներին՝ Ռուսաստան, Միացյալ Նահանգներ և Ֆրանսիա, ՌԴ նախագահին՝ որպես Արցախում խաղաղապահ առաքելություն իրականացնող երկրի ղեկավար, ինչպես նաև Նիկոլ Փաշինյանին՝ որպես Անկախության հռչակագրով Արցախի հարցում իրավական ու քաղաքական պատասխանատվություն ստանձնած պետության ղեկավարի։
Մանրամասները՝ տեսանյութում
