«Ոստիկանության հայցն ընդդեմ Գարիկ Գալեյանի անհիմն է». փաստաբան
«Կարծում եմ՝ դատարանը կմերժի Գարիկ Գալեյանի դեմ Ոստիկանության կողմից ներկայացված հայցը, քանի որ այն հիմնավոր չէր»,- այսօր Վարչական դատարանում կայացած դատական նիստի ավարտից հետո լրագրողների հետ զրույցում ասաց 44-օրյա պատերազմում զոհված Մխիթար Գալեյանի հոր՝ Գարիկ Գալեյանի պաշտպան Ներսես Հարությունյանը:
Փաստաբանի փոխանցմամբ՝ ոստիկանությունը նույնիսկ չի էլ փորձել հիմնավորել իր հայցը.
«Անհիմն հայց է: Հայցվոր կողմը պետք է հիմնավորեր, որ Գարիկ Գալեյանը թույլ է տվել վարչական իրավախախտում, որ ոստիկանի օրինական պահանջը չի կատարել, բայց չի հիմնավորել։ Այսինքն՝ եթե պահանջը չի եղել, ի՞նչը պետք է կատարեր անձը»:
Ավելի վաղ հայտնել էինք, որ այսօր Վարչական դատարանում կայացել է 44-օրյա պատերազմում զոհված զինծառայող Մխիթար Գալեյանի հոր՝ Գարիկ Գալեյանի գործով երկրորդ դատական նիստը:
Գարիկ Գալեյանին վարչական պատասխանատվության ենթարկելու համար դեռ նախորդ տարեվերջին էր ոստիկանությունը դիմել դատարան:
Ոստիկանությունը դատարանին ներկայացրած հայցով պահանջում է Գարիկ Գալեյանին ենթարկել պատասխանատվության Վարչական իրավախախտումների մասին ՀՀ օրենսգրքի 182-րդ հոդվածի պահանջով, այն է՝ Ոստիկանության զորքերի զինծառայողի կամ ոստիկանության ծառայողի օրինական պահանջը չկատարելը, որը պատժվում է սահմանված նվազագույն աշխատավարձի հիսնապատիկի չափով։
Ոստիկանության ներկայացուցիչն ինչպես առաջին դատական նիստին, այնպես էլ այսօր չէր ներկայացել, ուստի դատարանը որոշում կայացրեց և դատաքննությունն առանց հայցվոր կողմի իրականացրեց:
Նիստի ավարտին դատարանը հայտարարեց, որ դատական ակտը կհրապարակվի 2023 թվականի մարտի 7-ին:
Հիշեցնենք, որ 44-օրյա պատերազմում զոհված զինծառայողների ծնողները 2022 թվականի սեպտեմբերի 20-ից հերթապահություն էին իրականացրել «Եռաբլուր» զինվորական պանթեոնում, որպեսզի հաջորդ օրը՝ սեպտեմբերի 21-ին՝ ՀՀ անկախության 31-րդ տարեդարձի կապակցությամբ, վաղ առավոտյան, գաղտագողի տղաների շիրիմներին այցելող և ծաղիկներ խոնարհող Փաշինյանի և նրա թիմակիցների մուտքն արգելեին։ Սակայն ոստիկանության աշխատակիցները բռնի ուժ կիրառելով և մարմնական վնասվածքներ հասցնելով՝ բերման էին ենթարկել զոհված զինծառայողների ծնողներին, այդ թվում՝ մայրերին, ինչից հետո Փաշինյանն իր թիմակիցների հետ մտել էր պանթեոն։
