Երևանում նոր փողոցներ կանվանակոչվեն
Երևան քաղաքի ավագանու կանոնակարգի 26-րդ կետի համաձայն՝ 2023 թվականի փետրվարի 14-ին, ժամը 11:00-ին գումարվելու է Երևան քաղաքի ավագանու 10-րդ նստաշրջանի 1-ին նիստը։
Օրակարգում ընդգրկված հարցերի թվում է նաև մի շարք փողոցներ անվանակոչելու հարցը։
Այսպես, Երևան քաղաքի Արաբկիրի 35-րդ փողոցը կանվանակոչվի հայ դերասանուհի, ՀԽՍՀ ժողովրդական արտիստ, Երևանի պատվավոր քաղաքացի Սվետլանա Գրիգորյանի անվամբ՝ «Սվետլանա Գրիգորյան փողոց»։
Երևան քաղաքի Նորքի 7-րդ փողոցը կանվանակոչվի հայ երգչուհի, Կոմիտասի, հայ հոգևոր երգերի ու տաղերի կատարող Լուսինե Զաքարյանի անվամբ՝ «Լուսինե Զաքարյան փողոց»։
Երևան քաղաքի Արաբկիրի 33-րդ փողոցը կանվանակոչվի հայ դրամատուրգ Ժիրայր Անանյանի անվամբ` «Ժիրայր Անանյան փողոց»:
