Ղրղզստանի նախագահն ու արտգործնախարարը մտադիր են առաջիկա օրերին այցելել Իրան
Բիշքեկում Իրանի դեսպան Սաիդ Խարազին կիրակի օրը հայտարարել է, որ Ղրղզստանի նախագահ Սադիր Ջապարովը և արտաքին գործերի նախարար Ռուսլան Կազակբաևը մտադիր են առաջիկա օրերին այցելել Իրան, փոխանցում է իրանական Mehr լրատվական գործակալությունը։
Իրանը պատրաստ է բոլոր ոլորտներում համագործակցել Ղրղզստանի հետ, նշել է Խարազին՝ հավելելով, որ Թեհրանի համար Բիշքեկի հետ համագործակցության սահմանափակումներ չկան։
Նշելով, որ օրակարգում է իրանա-ղրղզական տնտեսական համատեղ հանձնաժողովի 13-րդ նիստը, Իրանի դեսպանը հայտարարել է, որ հանդիպման ընթացքում նախատեսվում է ստորագրել 10 փաստաթուղթ։
Խարազին նշել է, որ Իրանի զինված ուժերի գլխավոր հրամանատարի և Ղրղզստանի պաշտպանության նախարարի հեռախոսազրույցի ընթացքում իրանական կողմը պատրաստակամություն է հայտնել ռազմական հարաբերություններ պահպանել Բիշքեկի հետ։
Նա նաև հույս է հայտնել, որ Թեհրանն ու Բիշքեկը կամրապնդեն իրենց կապերը տրանսպորտի ոլորտում՝ հավելելով, որ վերջին տարիներին երկու երկրների միջև ապրանքաշրջանառության ծավալներն աճել են։
