Սննդաբանը նիհարելու 5 պարզ կանոն է նշել ամեն օրվա համար

Նիհարելու համար հարկավոր է նախաճաշին ավելի շատ սպիտակուցներ ուտել և նվազեցնել ալկոհոլի օգտագործումը՝ ասում է սննդաբան Մելիսա Միտրին: Այս մասին, ըստ shantnews-ի՝ գրում է Eat This, Not That!

Միտրին անվանել է հինգ պարզ կանոն ամեն օրվա համար, որոնք օգնում են նիհարել։ Նախաճաշին սպիտակուցային մթերքներ ուտելը դրանցից առաջինն է։ Սննդաբանը մեջբերել է American Journal of Clinical Nutrition ամսագրում հրապարակված ուսումնասիրությունը, որը հաստատում է սպիտակուցներով հարուստ սննդակարգերի արդյունավետությունը: Նա հավելել է, որ նախաճաշին սպիտակուց ուտելն օգնում է ձեզ ավելի երկար կուշտ զգալ:

Հաջորդ կանոնը կապված է ալկոհոլային խմիչքների օգտագործման հետ: Միտրիի խոսքով՝ ալկոհոլը պարունակում է դատարկ կալորիաներ և շաքար և կարող է հանգեցնել փքվածության։ Բացի այդ, հարբած վիճակում ավելի դժվար է խուսափել անառողջ սննդից։ Նա հորդորել է հնարավորինս նվազեցնել ալկոհոլի օգտագործումը կամ ամբողջությամբ հրաժարվել դրանից։

Շաքարավազ պարունակող մթերքներից, ըստ սննդաբանի, նույնպես լավ է խուսափել։ Որպեսզի չսխալվեք, պետք է ուշադրություն դարձնել մթերքների բաղադրությանը։ Օրինակ՝ շաքարավազը կարելի է գտնել հյութերի, վերամշակված մթերքների և անուշաբույր յոգուրտների մեջ։

Միտրիի մեկ այլ կանոն էլ ավելի շատ ջուր խմելն է: Մասնավորապես, նա առաջարկում է ուտելուց առաջ մեկ բաժակ ջուր խմել։

«Ջուրն օգնում է բարելավել մարսողությունը, էներգիա է հաղորդում և փակում է ախորժակը: Մի ուսումնասիրություն ցույց է տվել, որ նրանք, ովքեր ուտելուց առաջ 200 միլիլիտր ջուր են խմում, ավելի քիչ են ուտում»,- բացատրել է նա:

Սննդաբանը խորհուրդ է տվել նաև հետևել ձեր ուտելու սովորություններին և փորձել ավելի շատ շարժվել: Նրա խոսքով՝ քանի դեռ մարդը հստակ չի գիտակցել, թե որն է իր սխալը, նիհարելու փորձերը ցանկալի արդյունքի չեն բերի։