«Հենց այս համակարգը վերացնելն է մեր մշակութային քաղաքականության նպատակը». Նիկոլ Փաշինյան

ՀՀ վարչապետ Նիկոլ Փաշինյանը ֆեյսբուքյան իր էջում գրում է. «Երեկ Աննայի հետ գնացել էի Հայաստանի ազգային ակադեմիական երգչախմբի համերգին, նվիրված Կոմիտասի 150-ամյակին: Կոմիտասի 150-ամյակ, Ազգային ակադեմիական երգչախումբ, դիրիժոր՝ Հայաստանի ազգային հերոս Հովհաննես Չեքիջյան, հզորագույն համերգ: Եւ՝ կիսադատարկ դահլիճ:

Սա մեր մշակութային կյանքի եւ քաղաքականության իրական երեսն է. ում հարցնես՝ կասեն, որ Կոմիտասը, Չեքիջյանը, Ակադեմիական երգչախումբը մեզ համար ազգային արժեքներ են: Բայց համակարգը կառուցված է այնպես, որ այդ ազգային արժեքի հետ հնարավորինս քիչ մարդ շփվի, քիչ մարդ հարաբերվի:

Որովհետեւ՝ չէ՞ որ դա բարձր ազգային արժեք է, «ամեն մարդու խելքի բան չէ», կերպարվեստի գլուխգործոցները պետք է պահվեն թանգարանների «պադվալներում» (պահարաններում պահվող ռոկոկո բաժակների նման), որովհետեւ դրանք արժեք են եւ ոչ թե ամենօրյա կիրառման եւ յուրացման բովանդակություն: Թանգարաններ պետք է հնարավորինս քիչ մարդ գնա, կամ ընդհանրապես չգնա: Եվ այսպես շարունակ:

Հենց այս համակարգը վերացնելն է մեր մշակութային քաղաքականության նպատակը: Նոր Հայաստանում մարդը արվեստի, մշակույթի հետ պետք է իրական եւ մշտական հարաբերությունների մեջ լինի, ազգային արժեքները պետք է մոտ լինեն մարդուն՝ ծնողի, հարազատի, յուրայինի նման:

Եվ այս ընկալումը պետք է սերմանվի դպրոցից: Հենց այս խնդիրը, կամ խնդիրների այս համախումբը պետք է լուծի կրթության, գիտության եւ մշակույթի նախարարությունը»:

https://www.facebook.com/nikol.pashinyan/posts/2245445812442468?__xts__[0]=68.ARBnMxJ0z4-JzRfLrFBVF_yysdaENKANTRDlVrp3DxoVKtNG6YagJhFge6P0gFp904AUcvc3X4u5ZLsM91_us2h1xIp46zFIR3mngG0gzCAcOnoIcLG7RB48NaXiE7MkRZL1BALFHqrUgqEW1Mj1VBFqeiOLbXm0F7ocwQWg-a4S6s-eLgl_rJq_7av-L6i4sx3PdoXHZYDgkDy754DfJwp6oChJkwcPleF8R8YSAhGWmFnpSExjr31baL5Bd6z8RAwa2izk8zryh9aFnMZcIt04asL_IQbhITOGUnEewDaulpRiU2RafVGyG4fHoLA3a_PUiqP9PVzqK34FeJV0RC7y&__tn__=-R