Լոս Անջելեսի ոստիկանությունը հետաքննում է հայկական դպրոցների դարպասներին Թուրքիայի դրոշներ փակցնելու միջադեպը
Լոս Անջելեսի ոստիկանությունը հետաքննություն է սկսել Լոս 2 հայկական մասնավոր դպրոցների դարպասներին անհայտ անձանց կողմից Թուրքիայի դրոշներ փակցնելու միջադեպերի կապակցությամբ: Ինչպես հաղորդում է Los Angeles Times-ը, ոստիկանության և դպրոցների ներկայացուցիչների խոսքերով՝ անհայտ անձինք երեքշաբթի առավոտյան հայկական 2 դպրոցների դարպասներին փակցրել են Թուրքիայի դրոշներ և հեռացել:
Ոստիկանությունը հետաքննում է միջադեպերը, որոնք առաջացրել են Լոս Անջելեսի հայկական համայնքի անհանգստությունը և վրդովմունքը: Նշվում է, որ շատերը հայկական դպրոցների դարպասներին Թուրքիայի դրոշը կախելը նկարագրում են որպես ատելության գործողություն, որը միտված է հայկական համայնքի շրջանում վախ սերմանելուն և Հայոց ցեղասպանության վարկաբեկմանը:
Լոս Անջելեսի ոստիկանությունը ուսումնասիրում է տեսաձայնագրությունները և պլանավորում է ուժեղացնել հսկողությունը դպրոցների շրջակայքում:
ՀԲԸՄ Մանուկյան-Դեմիրճյան դպրոցի տնօրեն Արփի Ավանեսյանն ընդգծել է, որ իրենց համար անակնկալ է եղել դպրոցի դարպասին Թուրքիայի դրոշներ տեսնելը: «Մենք նման բան չէինք սպասում: Ես չգիտեմ, թե ի՞նչ է մտածել այդ մարդը: Ինչո՞ւ այսօր, ի՞նչն է նրանց ստիպել անել դա»,- ասել է նա:
ԱՄՆ Արևմտյան շրջանի Հայ դատի հանձնախմբի նախագահ Նորա Հովսեփյանը հայտնել է, որ Լոս Անջելեսի «Ֆերահյան» հայկական դպրոցի դարպասներին ևս Թուրքիայի դրոշներ են փակցված եղել. դպրոցը հիմնադրվել է շուրջ 60 տարի առաջ՝ Հայոց ցեղասպանությունը վերապրածների ժառանգների կողմից:
Լոս Անջելեսի ոստիկանության մամուլի խոսնակ Ջեֆրի Լին հայտնել է, որ գրանցված միջադեպերը գրանցվել են որպես ատելության հողի վրա իրականացված հանցագործություն:
Հունվարի 29-ին կայացած մամուլի ասուլիսի ժամանակ մի խումբ պաշտոնյաներ իշխանություններին կոչ են արել գտնել և պատասխանատվության ենթարկել կասկածյալին:
Երկու դպրոցներում էլ դրոշները փակցվել են մինչև աշակերտների ժամանումը: ԱՄՆ Արևմտյան շրջանի Հայ դատի հանձնախմբի նախագահ Նորա Հովսեփյանն ասել է, որ տեսաձայնագրություններում երևում է, որ դպրոցների դարպասներին դրոշները փակցրել է ամբողջությամբ սև հագնված 1 կամ 2 մարդ: «Մենք ցանկանում ենք, որ մարդիկ հասկանան անցյալի հանցագործությունը, և բոլորս կարող ենք ունենալ լուսավոր և երջանիկ ապագա: Մենք հույս ունենք, որ մի օր Թուրքիան կհասկանա, թե ինչ է արել իրենց կառավարությունը 100 տարի առաջ»,- ասել է Հովսեփյանը:
Կոնգրեսական Բրեդ Շերմանը ևս դատապարտել է տեղի ունեցածը և իրավապահ մարմիններին կոչ է արել արարքի հեղինակներին ձերբակալելը դարձնել առաջնահերթ խնդիր:
Ուսումնական օրվա ավարտին «Ֆերահյան» հայկական դպրոցի աշակերտները դպրոցի բազրիքներին և դարպասներին փակցրել են Հայաստանի դրոշը:
