Apple-ը կշտկի iPhone-ի աշխատանքի սխալները տեսազանգ կատարելիս
Apple ընկերությունը մինչեւ շաբաթվա վերջը կգործարկի ծրագրային ապահովման (ԾԱ) նորացում, որը կշտկի iPhone-ի աշխատանքի սխալները տեսազանգ կատարելիս: Այդ մասին հայտնել է Reuters գործակալությունը՝ վկայակոչելով ընկերության ներկայացուցչին:
Ավելի վաղ սարքի օգտատերերը նկատել են, որ սմարթֆոնի տերն հրավիրվող բաժանորդի հեռախոսից աուդիոն լսել է մինչեւ կանչին պատասխանելը: Նման իրավիճակները, ինչպես նշվում է, առաջացել են Apple FaceTime տեսազանգի գործառույթից օգտվելիս:
«Մենք գիտենք այդ խնդրի մասին, մենք արդեն գիտենք, թե ինչպես ենք անելու շտկումը, որը ԾԱ-ի նորացման մեջ կգործարկվի այս շաբաթ»,-ասել է Apple-ի ներկայացուցիչը: Ենթադրվում է, որ սխալը կապված է Apple-ի` խմբային տեսազանգերի գործառույթի հետ, որն ընկերությունը ներկայացրել է 2018 թվականի հոկտեմբերի վերջին, հաղորդել է ՏԱՍՍ-ը:
