Ռոնալդուին կարող են զրկել պետական պարգևներից

«Յուվենթուսի» հարձակվող Կրիշտիանու Ռոնալդուն կարող է զրկվել պետական պարգևներից՝ հարկերի վճարումից խուսափելու մեղադրանքների պատճառով: Այս մասին հայտարարել է Պորտուգալիայի նախագահ Մարսելու Ռեբելու դը Սոզան:

Ռոնալդուն ստացել էր Մեծ խաչ պարգևը Պորտուգալիային մատուցած ծառայությունների համար այն ժամանակ, երբ Պորտուգալիայի հավաքականը հաղթեց Եվրոպայի 2016 թվականի առաջնությունը: Ռոնալդուն նաև ունի շքանշան իր հայրենի Մադեյրա կղզուն մատուցած ծառայությունների համար:

«Օրենքը շատ պարզ է: Կանցլերը պետք է որոշի, թե արդյո՞ք այս իրադարձությունը բավարար հիմք է Ռոնալդուին մեդալներից զրկելու համար:

Պետք է թույլ տանք, որ նրանք, ովքեր ունենան անհրաժեշտ լիազորություն, որոշեն, թե արդյո՞ք այդ օրենքը կիրառելի է այս դեպքում»,- ասել է դո Սոզան:

Հիշեցնենք, որ Ռոնալդուն պետք է վճարի 18.8 միլիոն եվրո, ինչպես նաև պետք է պայմանականորեն ազատազրկվի 23 ամսով՝ հարկերից խուսափելու համար:

Հիշեցնենք, որ մամուլը գրում էր, որ Ռոնալդուն համաձայնության է եկել դատարանի հետ: Ըստ խոսակցությունների, 33-ամյա պորտուգալացին դատական նիստերի դահլիճում կխոստովանի, որ մեղավոր է և համաձայն է երկու տարվա պայմանական ազատազրկման:

Դատարանը Ռոնալդուին կճանաչի մեղավոր 14.7 միլիոն եվրո հարկերից խուսափելու համար: Ռոնալդուն արդեն իսկ վերադարձրել է 13.4 միլիոն եվրո:

Ըստ օրենքի՝ Ռոնալդուն պետք է մասնակցեր դատական նիստին, որպեսզի վավերացնի դատարանի հետ ձեռք բերված համաձայնությունը:

Ըստ համաձայնության՝ Ռոնալդուն հիմա չի ազատազրկվի, սակայն, եթե ևս մեկ անգամ Իսպանիայում խուսափի հարկերից, ապա կազատազրկվի երկար ժամկետով:
Առաջին դատական նիստը արդեն տեղի է ունեցել:

Սիրարփի Աղաբաբյան