Հունաստանի խորհրդարանը հավանություն տվեց Մակեդոնիայի նոր անվանման մասին Սկոպիեի հետ համաձայնագրին
Հունաստանի խորհրդարանը հավանություն Է տվել նախկին հարավսլավական Մակեդոնիայի Հանրապետությունը Հյուսիսային Մակեդոնիայի Հանրապետություն վերանվանելու վերաբերյալ Սկոպիեի հետ Աթենքի համաձայնագրին: Այդ մասին վկայում են քվեարկության արդյունքները, որը հունվարի 25-ին երկրի գլխավոր օրենսդիր մարմնում կայացել է եռօրյա բանավեճերի ավարտից հետո:
Համաձայնագրին հավանություն տալու օգտին քվեարկել է 300-տեղանոց խորհրդարանի 153 պատգամավոր, 146-ը դեմ է արտահայտվել, մեկը ձեռնպահ է մնացել: Կանոնակարգի համաձայն, համաձայնագրի վավերացման համար բավարար կլիներ դահլիճում ներկա գտնվող պատգամավորների ձայների պարզ մեծամասնությունը:
Նախկին հարավսլավական հանրապետության նոր պաշտոնական անվանման մասին այսպես կոչված Պրեսպայի համաձայնագիրը 2018 թվականի հունիսի 17-ին Մակեդոնիայի եւ Հունաստանի արտաքին գործերի նախարարների կողմից ստորագրվել է Պրեսպա լճի ափին, որով անցնում է երկու երկրների միջեւ սահմանը:
Այն, մասնավորապես, նախատեսում է Մակեդոնիայի Հանրապետության վերանվանումը Հյուսիսային Մակեդոնայի Հանրապետություն: Երկու երկրների խորհրդարանականների կողմից համաձայնագրի վավերացումը Սկոպիեի համար ճանապարհ է բացում դեպի ՆԱՏՕ եւ Եվրամիություն, հաղորդել է ՏԱՍՍ-ը:
