Ռիհաննան հորը դատի է տվել իր բրենդն օգտագործելու համար
Ամերիկացի երգչուհի եւ դերասանուհի Ռիհաննան իր հոր դեմ հայց է ներկայացրել դատարան այն բանի համար, որ նա դստեր հետ ասոցացվող Fenty բրենդի անվանումն օգտագործում է առեւտրային նպատակներով՝ միլիոնավոր դոլարներ ստանալու համար: Այդ մասին հայտնել է Variety հրատարակությունը:
Հայցադիմումում արտիստուհին, որի ամբողջական անունը Ռոբին Ռիհաննա Ֆենթի է, հայտարարել է, թե իր հայրը՝ Ռոնալդ Ֆենթին, ստեղծել է տաղանդների որոնման Fenty Entertainment ընկերությունը՝ փորձելով իր դստեր անունն օգտագործել շահույթ ստանալու համար:
Ռիհաննան, որը հիմնադրել է Fenty Beauty եւ Savage x Fenty բրենդները, նշում է, որ մի քանի անգամ հորը խնդրել է՝ իր անունից բիզնես չվարել, բայց հայրը անտեսել է նրա խնդրանքները: Ռիհաննան հայտարարել է, որ հայրը եւ նրա գործընկեր Մոզես Ջոքթան Փերքինսը պատասխանատու են անբարեխիղճ գովազդի եւ իր անձնական կյանքին միջամտելու համար: Հայցադիմումում երգչուհին ձգտում է արգելք դնել Ռոնալդ Ֆենթիի կողմից Fenty առեւտրանիշի օգտագործման կամ դստերն անօրինականորեն ներկայացնելու որեւէ այլ եղանակի վրա, հաղորդել է ՌԻԱ Նովոստին:
