ԱՄՆ-ի Սենատում Թրամփին խորհուրդ են տվել ժամանակավորապես վերականգնել կառավարության աշխատանքը
Ազդեցիկ հանրապետական սենատոր Լինդսի Գրեմը կարծում է, որ Միացյալ Նահանգների կառավարության աշխատանքի ժամանակավոր վերականգնումը կարող է Դոնալդ Թրամփին օգնել առաջընթացի հասնել Մեքսիկայի հետ սահմանի արգելապատի ֆինանսավորման շուրջը դեմոկրատների հետ բանակցություններում:
Fox News-ի եթերում Գրեմն ասել է, որ սահմանին տիրող ճգնաժամի պատճառով Թրամփի կողմից արտակարգ դրության սահանումը որպես ծայրահեղ միջոց է ընկալվում, սակայն, ինչպես նշել է նա, իրադարձությունների նման զարգացումն ավելի ու ավելի հավանական է դառնում։
Սենատորն առաջարկել է վերականգնել կառավարության աշխատանքը, նախքան դա տեղի կունենա:
«Ես նրան (Թրամփին – խմբ.) խորհուրդ կտայի կարճ ժամանակով վերականգնել կառավարության աշխատանքը, օրինակ՝ երեք շաբաթով… տեսնենք, մենք կկարողանանք արդյոք համաձայնության հասնել: Եթե երեք շաբաթվա ավարտին մեզ չհաջողվի… տեսնենք, նա կկարողանա արդյոք ինքը դա անել արտակարգ դրություն սահմանելու միջոցով»,- հայտարարել է Գրեմը, հաղորդել է ՌԻԱ Նովոստին:
