Քանի՞ հանձնաժողով կունենա 7-րդ գումարման խորհրդարանը
Նորընտիր Ազգային ժողովի առաջին «քայլերից» մեկը լինելու է մշտական հանձնաժողովներ ստեղծելու մասին որոշման ընդունումը։ Թե քանի՞ հանձնաժողով կունենա 7-րդ գումարման խորհրդարանը, պարզ չէ։ Օրինակ՝ 6-րդ գումարման Աժ-ն ուներ 9 մշտական հանձնաժողով, 4-րդ և 5-րդ գումարմանը՝ 12։ Որևէ հանձնաժողովի գոյություն օրենքը չի պարտադրում։
ԱԺ կանոնակարգ օրենքը (Հոդված 10) սահմանում է.
«1. Մշտական հանձնաժողովներն ստեղծվում են օրենքների նախագծերի, Ազգային ժողովի իրավասության մեջ մտնող այլ հարցերի նախնական քննարկման և դրանց վերաբերյալ Ազգային ժողով եզրակացություններ ներկայացնելու, ինչպես նաև խորհրդարանական վերահսկողություն իրականացնելու համար:
1. Մշտական հանձնաժողովները ստեղծվում են Ազգային ժողովի առաջին նստաշրջանում՝ Ազգային ժողովի որոշմամբ: Որոշման նախագիծը ներկայացվում և քննարկվում է Կանոնակարգի 112-րդ հոդվածով սահմանված կարգով:
2. Մշտական հանձնաժողովների ստեղծումից հետո դրանց թիվը չի կարող փոփոխվել»:
«Իմ քայլի» նորընտիր պատգամավոր Ալեն Սիմոնյանը 168.am-ի հետ զրույց նշեց, որ մշտական հանձնաժողովների մասին որոշում չունեն. «Վերջնական պատկերը չկա»։
Դիտարկմանը, թե ե՞րբ կլինի, Ա.Սիմոնյանը դժվարացավ պատասխանել. «Անկեղծ ասած՝ չեմ կարող ասել»։
