ՀՀ դեսպանը և Բելառուսի առողջապահության նախարարը քննարկել են բնագավառում համագործակցության ընդլայնման հարցեր
Բելառուսում Հայաստանի դեսպան Արմեն Ղևոնդյանի և Բելառուսի առողջապահության նախարար Վալերի Մալաշկոյի հունվարի 8-ին կայացած հանդիպմանն անդրադարձ է կատարվել հայ-բելառուսական միջկառավարական հանձնաժողովի 13-րդ նիստի առողջապահության ոլորտին առնչվող որոշումների իրականացման ընթացքին: Մտքեր են փոխանակվել երկու պետությունների միջև առողջապահության բնագավառում համագործակցության հետագա ընդլայնման, փորձի փոխանակման և նախատեսվող երկկողմ միջգերատեսչական փոխայցելությունների ու մասնագիտական հանդիպումների շուրջ։
Ինչպես տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից, նախարար Մալաշկոն ներկայացրել է ԱՊՀ մասնակից պետությունների քաղաքացիներին բուժօգնություն ցուցաբերելու մասին 1997 թվականին ստորագրված պայմանագրի դրույթների կիրառման մանրամասները, համաձայն որոնց՝ անհետաձգելի իրավիճակների դեպքում շտապ կամ անհապաղ բժշկական օգնությունը Բելառուսում գտնվող Հայաստանի քաղաքացիներին ցուցաբերվում է անհատույց։
Պայմանավորվածություն է ձեռք բերվել առաջիկայում շարունակել նման ձևաչափով քննարկումները մասնագիտական փոխգործակցության և կապերի խթանմանը նպաստելու համար:
