Տասնմեկ քաղաքական ուժերի ցուցակների առաջին համարները ներկայացրին կոռուպցիայի դեմ պայքարի ու տնտեսության զարգացման իրենց տեսլականները
ԱԺ արտահերթ ընտրություններին մասնակցող 11 քաղաքական ուժերի ընտրական ցուցակների առաջին համարները ներկայացրին կոռուպցիայի դեմ պայքարի ու տնտեսության զարգացման իրենց տեսլականները: Այս մասին կուսակցությունների ու դաշինքների առաջնորդները խոսեցին Առաջին ալիքի եթերում դեկտեմբերի 9-ին կայանալիք ԱԺ արտահերթ ընտրություններին մասնակցող 11 քաղաքական ուժերի առաջին համարների բանավեճի ընթացքում:
«Կոռուպցիայի դեմ պայքարում ամենակարևորն այն է, որ մենք կարողանանք մեր աշխատողների աշխատավարձերը բարձրացնել՝ սկսած կառավարության անդամներից, ուսուցիչներից: Տնտեսության զարգացման համար մենք այսօր պետք է ներդրումային ծրագիր ունենանք: Այնպես պետք է անենք, որ ոչ թե մենք խնդրենք ներդնողին ներդրում անել, այլ մենք ընտրենք ներդրում անել ցանկացողների միջից»,- ասաց ԲՀԿ ցուցակի առաջին համար Գագիկ Ծառուկյանը:
«Կոռուպցիայի դեմ պայքարի համար կան կոնկրետ սահմանված չափանիշներ: Եթե խոսքը վերաբերում է Հայաստանին, ապա մենք պետք է նկատի ունենանք, որ կոռուպցիան եղել է կառավարման հիմնական մեխանիզմ: Նախ` պետք է արմատախիլ արվի այդ մեխանիզմը, իսկ դրա հիմնական և առաջնային քայլը անցումային արդարադատությունն է ու հանցավոր համագործակցությանը պատասխանատվության կանչելը»,- նշեց «Սասնա ծռեր» կուսակցության ցուցակի առաջին համար Վարուժան Ավետիսյանը:
«Կոռուպցիայի դեմ պայքարն առանցքային նշանակություն ունի Հայաստանի համար: Անհրաժեշտ է ստեղծել միջազգային հետաքննչական մեխանիզմ՝ կոռուպցիայի դեմ համակարգված պայքար մղելու, մեղավորներին հայտնաբերելու ու պատասխանատվության ենթարկելու համար: Տնտեսության հետ կապված՝ 8 ամիսը բավարար է երկրի ռազմավարական զարգացման տեսլական, սոցիալ-տնտեսական ծրագիր ներկայացնելու համար, և մենք հույս ունենք, որ արտահերթ ընտրություններից հետո այդ ծրագիրը կլինի»,- նկատեց «Օրինաց երկիր» կուսակցության ցուցակի առաջին համար Արթուր Բաղդասարյանը:
«Կոռուպցիայի մակարդակը նվազեցնելու լավագույն մեթոդը հզոր տնտեսություն ունենալն է: Նախ` տնտեսությունը պետք է ուժեղանա, ավելի շատ եկամուտներ բերի, ու այսօրվա կոռուպցիայի պարագայում այդ ցուցանիշը տոկոսով կիջնի: Երկրորդ՝ անհնարին է որևէ ճյուղ առանձին վերցված փորձել բարելավել, կոռուպցիան արմատախիլ անելու համար պետք է համակարգված աշխատեն բոլոր կառույցները: Մենք տարածաշրջանում լուրջ ազդեցություն ունեցող երկիր կարող ենք դառնալ, եթե մեր ուժերը միավորենք այս երկիրը երկիր դարձնելու համար»,- նշեց «Մենք» դաշինքի ցուցակի առաջին համար Արամ Սարգսյանը:
«Կոռուպցիան շատ լայն հասկացություն է: Այդ պատճառով դրա դեմ պայքարը պետք է լինի ոչ միայն համակարգային, այլև պետք է լինի կանխարգելիչ: Մենք պետք է դիտարկենք կոռուպցիան իր ամբողջ լայն սպեկտրով, և այստեղ շատ գործ ունենք անելու: Իհարկե, հնարավոր չէ պայքարել կոռուպցիայի դեմ, եթե չիրականացվի քաղաքական և տնտեսական լյուստրացիա: Տնտեսությունը զարգացնելու համար մենք պետք է վայրենի վաշխառուական համակարգի վրա վերահսկողություն սահմանենք, որովհետև բանկերը ֆինանսը վերցրել են իրենց ձեռքը, և դա օգտագործում են զուտ գերշահույթ ստանալու համար»,- ասաց «Ազգային առաջընթաց» կուսակցության ցուցակի առաջին համար Լուսինե Հարոյանը:
«Օրենսդրության պարզություն է պետք: ՀՀ օրենսդրությունը նման ոլորտներում նպաստում է կոռուպցիային: Պատժի անխուսափելիության մեխանիզմը պետք է աշխատի 100 տոկոսով: Արժեհամակարգը պետք է վերադառնա ու ազգային լավագույն ավանդույթները պետք է վերադառնան, այս բոլորի համախումբը կտա այն արդյունքը, որն ուզում ենք»,- նշեց «Քրիստոնեա-ժողովրդական վերածնունդ» կուսակցության ցուցակի առաջին համար Լևոն Շիրինյանը:
«Կոռուպցիայի դեմ պայքարի համար մեզ պետք է առողջ քաղաքական համակարգ: Մենք 7-րդ գումարման խորհրդարանում զբաղվելու ենք հակակոռուպցիոն ունիվերսալ մարմնի ստեղծման լոբբինգ անելով, և այնպիսի շահերի բախման օրենսդրություն մշակելով, որ այն մարդիկ, ովքեր հստակ շահերի բախման մեջ են, չլինեն խորհրդարանում: Տնտեսական զարգացման մասին՝ մենք այնպիսի օրենսդրություն ենք մշակելու, որ գյուղացին լինի պաշտպանված»,- ասաց «Լուսավոր Հայաստան» կուսակցության ցուցակի առաջին համար Էդմոն Մարուքյանը:
«Հայաստանից համակարգային կոռուպցիան արմատախիլ է արված, և այսօր կոռուպցիայի դեմ պայքարում աննախադեպ գործընթաց է ընթանում: Կոռուպցիայի դեմ հետագա պայքարի համար առաջին հերթին հարկավոր է քաղաքական կամք, և անհրաժեշտ է ստեղծել մեխանիզմներ, որ հակակոռուպցիոն ունիվերսալ առանձին մարմին գոյություն ունենա: Ինչ վերաբերում է տնտեսությանը՝ առաջինը 10 ամսվա տվյալներով Հայաստանում կա 6.6% տնտեսական աճ, արտահանումն աճել է 11%-ով: Զբոսաշրջությունն աճել է 8.8%-ով, գյուղմթերքի արտահանումն աճել է 61%-ով, ագրոմթերքի արտահանումն աճել է 8%-ով, և դեռ պետք է շարունակի աճել»,- նշեց «Իմ քայլը» դաշինքի ցուցակի առաջին համար Նիկոլ Փաշինյանը:
«Եթե մենք ուզում ենք իրական կոռուպցիայի դեմ պայքար տանել, պետք է հասկանանք, որ դա չի կարող կատարել կառավարությունը, դա պետք է կատարվի ինստիտուցիոնալ և անկախ մարմնի կողմից: Տնտեսության վերաբերյալ՝ տնտեսական մեր կարգը սոցիալական-շուկայական տնտեսությունն է՝ Սահմանադրությամբ: Սա է պետք կյանքի կոչել»,- ասաց ՀՅԴ ցուցակի առաջին համար Արմեն Ռուստամյանը:
«Հայաստանում խնդիրը կոռուպցիայի դեմ պայքարը ինստիտուցիոնալ հենքի վրա դնելն է: Կոռուպցիան սոցիալական երևույթ է, և նույնիսկ ամենախիստ ուժային մեթոդներով հնարավոր չէ այն արմատախիլ անել: Տնտեսության վերաբերյալ՝ հանրային կառավարման համակարգը հանդիսանում է միջավայր ձևավորող ազդեցիկ գործոն, այս կապակցությամբ մենք հանրային կառավարման համակարգի ուղղությունների վերաբերյալ գործունեություն կծավալենք»,- ասաց «Քաղաքացու որոշում» կուսակցության ցուցակի առաջին համար Սուրեն Սահակյանը:
«Կոռուպցիայի դեմ պայքարը պետք է համակարգված անել: Եթե անենք այնպես, ինչպես անում ենք, Հայաստանում ներդրումները զրոյին կմոտենան, որովհետև կապիտալը չի սիրում, երբ իրեն անընդհատ բզում ես: Այն օրենսդրությունը, որը կա հիմա« լավ հնարավորություններ է տալիս, հուսամ՝ դա ճիշտ կօգտագործվի»,- նշեց ՀՀԿ ցուցակի առաջին համար Վիգեն Սարգսյանը:
Հայաստանում արտահերթ խորհրդարանական ընտրությունները կայանալու են 2018 թ. դեկտեմբերի 9-ին: Քարոզչության ժամանակահատվածը նոյեմբերի 26-ից դեկտեմբերի 7-ն է։ Ընտրական օրենսգրքով սահմանվել է 12-օրյա ժամկետ:
