Գլոբալ հիմնադրամը կշարունակի աջակցել առողջապահության նախարարությանը
Առողջապահության նախարար Արսեն Թորոսյանն ընդունել է Գլոբալ հիմնադրամի Հայաստանի ծրագրերի պորտֆոլիո ղեկավար Վալերիա Գրիշեչկինային:
Ինչպես տեղեկացրին ՀՀ առողջապահության նախարարության հասարակայնության հետ կապերի բաժնից, հյուրը նախարարին է ներկայացրել տուբերկուլյոզի և ՄԻԱՎ/ՁԻԱՀ-ի դեմ պայքարին ուղղված ընթացիկ դրամաշնորհային ծրագրերի առաջընթացն ու խնդիրները: Նա նշել է, որ Հայաստանը զգալի ձեռքբերումներ է գրանցել երկու հիվանդությունների դեմ պայքարում, և, որ համագործակցությունն այդ ուղղություններով առաջիկա տարիներին ևս կշարունակվի:
Գլոբալ հիմնադրամի պորտֆոլիո ղեկավարը նաև պատրասակամություն է հայտնել դրամաշնորհային ծրագրերի շրջանակներում հնարավորինս աջակցել առողջապահության նախարարությանը` համակարգի բարեփոխումների ու ծախսարդյունավետության բարձրացմանն ուղղված միջոցառումների իրականացման գործում:
Նախարարը շնորհակալություն է հայտնել Գլոբալ հիմնադրամի ներկայացուցչին երկար տարիների համագործակցության համար, և նշել, որ կարվի հնարավորը ծրագրի արդյունքների կայունությունն ապահովելու համար:
