Ոստիկանությունը չի իրականացնելու հանցագործության մասին վերացական հաղորդման վերաբերյալ քրեադատավարական ստուգում
«Պահանջում ենք քրեական գործ հարուցել և պարզել Գարեգին 2-րդի դեմ հնչեցված մեղադրանքների իսկության հարցը» վերտառությամբ հոդվածում analitik.am-ի նշած տեղեկությունը ենթադրյալ հանցագործության մասին վերացական հաղորդում է, որի վերաբերյալ ոստիկանությունը քրեադատավարական ստուգում չի իրականացվելու: Այս մասին նշված է ՀՀ ոստիկանության պաշտոնական կայքում տեղադրված պարզաբանման մեջ:
Պարզաբանման մեջ նշված է. «ՀՀ ոստիկանությունը բազմիցս պարզաբանել է, որ սոցիալական ցանցերում առանձին օգտատերերի կողմից հանցագործության մասին վերացական հաղորդումները չեն կարող գնահատվել և ստուգվել որպես քրեական գործ հարուցելու օրինական առիթներ: Բացառություն են կազմում էլեկտրոնային զանգվածային լրատվության միջոցների այն հաղորդումները, որոնք սոցիալական ցանցերում շրջանառվում են որպես հանցագործության մասին հաղորդումներ, և դրանց բովանդակությանը բնորոշ է կոնկրետությունն ու առերևույթ հանցագործության հատկանիշների նկարագրությունը:
ՀՀ քրեական դատավարության օրենսգրքով սահմանված կարգով ստուգվում են
էլեկտրոնային լրատվամիջոցների այն բոլոր հաղորդումները, որոնցով հնարավոր է նույնականացնել հանցագործության դեպքը կամ հանցագործություն կատարող ենթադրյալ անձանց կամ հանցագործության վայրը, ժամանակը, եղանակը:
Միաժամանակ պարզաբանում ենք, որ սուտ մատնության համար ՀՀ քրեական օրենսգրքի 333-րդ հոդվածով նախատեսված քրեական պատասխանատվության կարող են ենթարկվել այն անձինք, ովքեր, հանցագործության մասին սուտ մատնություն կատարելով, հաղորդումները հասցեագրում են իրավապահ մարմիններին:
analitik.am կայքի «Պահանջում ենք քրեական գործ հարուցել և պարզել Գարեգին 2-րդի դեմ հնչեցված մեղադրանքների իսկության հարցը» վերտառությամբ հոդվածում (https://analitik.am/news/view/417126) նշված տեղեկությունը ենթադրյալ հանցագործության մասին վերացական հաղորդում է, որի վերաբերյալ քրեադատավարական ստուգում չի իրականացվելու»:
