«Հայկական կողմը կշարունակի ջանքեր գործադրել Հայաստանի ու Կիպրոսի միջև միջխորհրդարանական համագործակցության ավելի ընդլայնմանն ու ամրապնդմանը»
Այսօր ՀՀ Ազգային ժողովում Կիպրոսի Հանրապետության Ներկայացուցիչների պալատի նախագահ Դեմետրիս Սիլուրիսի հետ հանդիպումից հետո համատեղ ասուլիսում ՀՀ ԱԺ նախագահ Արա Բաբլոյանը բարձր գնահատեց եկկողմ խորհրդարանական համագործակցությունը:
Նա կարևորեց կիպրահայ համայնքի պետական ներկայացուցիչ, Կիպրոսի խորհրդարանի պատգամավոր Վարդգես Մահտեսյանի ներդրումը միջխորհրդարանական և միջպետական հարաբերությունների զարգացման գործում:
ԱԺ նախագահը նշեց, որ անդրադարձել են միջխորհրդարանական կազմակերպությունների շրջանակում Կիպրոսի նախագահի առաջարկին` ստեղծել եռակողմ ՀՀ-Կիպրոս-Հունաստան համատեղ հանձնաժողով, նաև անդրադարձել են ԼՂ և կիպրոսի հիմնահարցերին.
«Հայաստանը և Կիպրոսը միջազգային հարթակներում մշտապես սատարել են միմյանց դիրքորոշումները` խնդիրների կարգավորման հարցերում: Քննարկել ենք նաև Հայոց Ցեղասպանության ճանաչման խնդիրը, Կիպրոսն առաջին երկիրն է, որ ճանաչել և դատապարտել է Ցեղասպանությունը, Կիպրոսի ազգային օրենսդրությամբ քրեականացվել է Հայոց ցեղասպանության ժխտումը»:
Ա.Բաբլոյանը նշեց, որ խոսել են ՀՀ-ԵՄ փոխգործակցության մասին, անդրադարձել ՀՀ-ԵՄ համաձայնագրի վավերացման գործընթացին. «Հայկական կողմը կշարունակի ջանքեր գործադրել Հայաստանի ու Կիպրոսի միջև միջխորհրդարանական համագործակցության ավելի ընդլայնմանն ու ամրապնդմանը»:
Դեմետրիս Սիլուրիսի խոսքով` պետք է օգտագործել այն ամուր պատմական կապերը, որ առկա են երկու ժողովուրդների միջև և կարողանանք այդ կապերն է՛լ ավելի արդյունավետ օգտագործել տնտեսական, մշակութային և այլ ոլորտներում` ի նպաստ մեր ժողովուրդների: Նա ևս խորին երախտագիտություն ու շնորհակալություն հայտնեց Վարդգես Մահտեսյանին իր գործուն աջակցության համար, և նշեց, որ իր աջակցությամբ աշնանը համատեղ ցուցահանդես կկազմակերպվի:
«Վստահ եմ, որ ապագան մեր ժողովուրդներին է պատկանում, որի հիմքն է հանդիսանում քաղաքակրթությունը ու ժողովրդարությունը և ոչ թե բարբարոսությունը»,- ասաց Դ. Սիլուրիսը:
