«Ռոբերտ Քոչարյանը փորձում էր ևս մեկ Մարտի 1 կազմակերպել, բայց հանդիպեց ժողովրդի միասնական արհամարհանքին». Դավիթ Սանասարյան
«Ես պաշտոնապես հավաստիացնում եմ, որ Արցախի վերաբերյալ Նիկոլի երեկվա հայտարարությունն աննախադեպ էր, իշխանությունները մինչ այժմ շատ ավելի ցածր նշաձող են սահմանել»,- Հանրապետության հրապարակում կազմակերպված հանրահավաքի ժամանակ այս մասին ասաց Դավիթ Սանասարյանը։
Նա անդրադարձավ նաև Ռոբերտ Քոչարյանին՝ նշելով, որ այն մարդը, ով նախկինում Սահարա անապատում սատկած առյուծներ էր նկարում, նորից հարթակում է հայտնվել.
«Այս մարդն անհանգստացած է, որովհետև իր քավորությամբ ստեղծված արատավոր համակարգը փլուզվում է։ Այս մարդը անհանգստացած է, քանի որ փորձում էր ևս մեկ Մարտի 1 կազմակերպել, բայց հանդիպեց ժողովրդի միասնական արհամարհանքին։ Ուրեմն՝ հավաքիր շորերդ, հանցագործ թիմդ ու սսկվիր կամ գնա այստեղից։ Այս ժողովուրդը քեզ ուղարկել է գրողի ծոցը»։
Սանասարյանն ասաց, որ որևէ երկիր չի կարող խառնվել հայ ժողովրդի գործերին, չի կարող կասեցնել նրա հաղթանակը։
