«Դա ամենավտանգավոր հարցն է, որ կարող է կործանել հայկական պետականությունը». Արմեն Աշոտյան
Այսօր ԱԺ-ում քննարկվում է «Ելք» խմբակցության կողմից ներկայացված «ՀՀ մասով ԵՏՄ պայմանագրի գործողությունը դադարեցնելու գործընթաց սկսելու վերաբերյալ» Հայաստանի Հանրապետության Ազգային ժողովի հայտարարության նախագծի վերաբերյալ Ազգային ժողով եզրակացություն ներկայացնելու համար ԱԺ ժամանակավոր հանձնաժողով ստեղծելու մասին» որոշման նախագիծը։
ՀՀԿ խմբակցության պատգամավոր Արմեն Աշոտյանի դիտարկմամբ՝ քննարկումներին պաթոսն է խանգարում. «Սա ոչ անկախության հարց է, անկախության հարցը չի վիճարկվում, չի էլ կարելի խոսել ապաշնորհ քաղաքականության մասին։ Ես խնդրում եմ՝ քննարկումը երբեք չվերածել «Ռուսաստան թե Արևմուտք» հարցի. ամենավտանգավոր հարցն է, որ կարող է կործանել հայկական պետականությունը։ Մենք երկար ժամանակ դուրս ենք մնացել աշխարհաքաղաքական պայքարի խրամատներից. պետք չէ՝ խրամատն անցնի Հայաստանով։ Աշխարհաքաղաքական խրամատը որ երկրով անցավ՝ այդ երկրներին լավ բան չի սպասվում»։
