«Կառավարությունը սուբսիդավորում է իրեն մոտ կանգնած բիզնեսը». Լենա Նազարյան

ԱԺ «Ելք» խմբակցության պատգամավոր Լենա Նազարյանն այսօր խորհրդարանում հայտարարեց, որ եղած հակակարկտային կայանները չեն պաշտպանում բերքը կարկուտից։ «Նույնիսկ ԱԻՆ-ը դրանց արդյունավետությունը գնահատել է ընդամենը 10%: Այսօր, պարոն վարչապետ, Դուք ասացիք, որ 12 մլն դոլար ներդրում է արվելու այդ կայանները վերազինելու համար։ Ես կարծում եմ, որ դա օգուտ չի տա, որովհետև բերքը փչանում է ոչ միայն կարկուտից, այլ նաև ցրտից»։

Պատգամավորը նկատեց՝ քանի որ այդ կայաններն արդյունքում օգուտ չեն տալիս, հաջորդիվ կառավարությունը որոշում է օգնել գյուղացուն, բայց նրա խոսքով՝ ոչ թե փորձում է հնարավորինս շուտ ներդնել գյուղատնտեսության ապահովագրության ինստիտուտ, այլ սուբսիդավորում է դիզելային վառելիքը և պարարտանյութերը.

«Այստեղ ամենահետաքրքիրն է. օրինակ՝ իմանում ենք, որ կա «Մասիսի բերրիություն» ընկերություն, որը, ըստ լուրերի՝ կապված է նախկին վարչապետ Հովիկ Աբրահամյանի շրջապատի հետ, և որը 4 տարի շարունակ առանց մրցույթի Գյուղնախարարության կողմից ստացել է պարարտանյութ ներկրելու պատվեր։

Ի դեպ, պետությունը 1.5 մլրդ դրամ կխնայեր, եթե մրցույթ հայտարարվեր։ Սա էլ Տնտեսական մրցակցության պաշտպանության պետական հանձնաժողովի եզրակացությունն է։ Կամ, օրինակ, իմանում ենք, որ կա «Մաքսհուր» ընկերությունը, որը վառելիքի խոշոր ներկրող է և որը ղեկավարում է ՀՀԿ նախկին պատգամավոր Հարություն Փամբուկյանի եղբայր Արմեն Փամբուկյանը։ Այս տարի արդեն «Մաքսհուր» ընկերությունը պետության կողմից ստացել է 170 մլն դրամ՝ վառելիք ներկրելու համար»։

Նազարյանը նկատեց՝ ակնհայտ է, որ սուբսիդիաներից օգուտ ստանում է միայն բիզնեսը, այն էլ՝ ոչ պատահական բիզնեսը. «Գյուղացին դրանից օգուտ չի ստանում։ Դրա համար պետք է ժամ առաջ ներդնել գյուղատնտեսության ապահովագրության համակարգ, իսկ կառավարության ծրագրում ասվում է, որ այն հետագայում կներդրվի։ Դա վկայում է այն մասին, որ այս կառավարությունը ևս նպատակադրված չէ խնդրին համակարգային լուծում տալ, բայց դեմ չէ սուբսիդավորել իրենց մոտ կանգնած բիզնեսը»։