Կարեն Կարապետյանը՝ 2018թ. վարչապետի պաշտոնը զբաղեցնելու մասին
Վարչապետ Կարեն Կարապետյանն ԱԺ-ում պատասխանելով «Ելք» խմբակցության պատգամավոր Էդմոն Մարուքյանի հարցին՝ 2018թ. շարունակելո՞ւ է զբաղեցնել վարչապետի պաշտոնը, թե՞ ոչ, ասաց, որ այդ հարցին բազմաթիվ անգամ պատասխանել է և պատասխանը չի փոխվել: «Այն հանգամանքը, որ մենք կառավարության ծրագիրը ֆիքսել ենք 2017-2022 թվականների համար, ինչ-որ առումով պատասխանում է ձեր հարցին»,- ասաց Կարեն Կարապետյանը:
Անդրադարձավ Էդմոն Մարուքյանի դիտարկմանը, թե կառավարության ծրագիրը քննարկելու համար Կարեն Կարապետյանը հրաժարվել է հանդիպել «Ելք» խմբակցության հետ՝ պատճառաբանելով, որ ժամանակ չունի, վարչապետն ասաց.
«Ես երեկ ժամը 18:00-ին եկել էի ձեզ հետ հանդիպման և զարմացա, որ «Ելք» խմբակցությունը ներկա չէր: Ես կառավարության ծրագիրը ներկայացնելու համար խորհրդարանական բոլոր խմբակցությունների հետ հանդիպելու պատրաստակամություն հայտնել եմ և երեկ էլ եկել էի ձեզ հետ հանդիպման: Ես չեմ ասել՝ հանդիպելու ժամանակ կամ ցանկություն չունեմ: Նման ձևակերպում չի եղել»:
