Էրդողանը երկրում «արդարության երթ»-ի մասնակիցներին ահաբեկիչ է անվանել
Թուրքիայի նախագահ Ռեջեփ Թայիփ Էրդողանը երկրում գլխավոր ընդդիմության՝ Հանրապետական ժողովրդական կուսակցության կողմից կազմակերպված «արդարության երթ»-ի մասնակիցներին մեղադրել է ահաբեկիչների հետ համագործակցելու մեջ: Այս մասին հայտնում է թուրքական Diken-ը:
«Քաղաքականության մեջ խոսք ունեցող անձը պետք է այն արտահայտի ոչ թե ճանապարհներին, այլ մեջլիսի ամբիոնի մոտ: Հիմա նրանք չե՞ն քայլում ահաբեկչական կազմակերպությունների՝ Քրդական բանվորական կուսակցության (PKK), Ժողովուրդների դեմոկրատական կուսակցության (խմբ.-Թուրքիայի մեջլիսի քրդամետ կուսակցությունն է), գյուլենականների հետ ձեռք ձեռքի տված»,- ասել է Էրդողանը:
Թուրքիայի գլխավոր ընդդիմադիր Հանրապետական ժողովրդական կուսակցության առաջնորդ Քեմալ Քըլըչդարօղլուն և նրա կողմնակիցները հունիսի 15-ին սկսել են իրենց երթը Անկարայի Գյուվենպարկ զբոսայգուց: Երթը պետք է ավարտվի Ստամբուլի Մալթեփեի բանտի մոտ: Այն իրականացվում է՝ ի նշան բողոքի նույն կուսակցության պատգամավոր Էնիս Բերբերօղլուին 25 տարվա ազատազրկման մասին դատարանի որոշման: Քըլըչդարօղլուն ասել է, որ օրական պետք է անցնեն 18 կմ: Ակնկալվում է, որ երթը կշարունակվի 28 օր: Քեմալականները քայլելուց հետո գիշերելու են ճանապարհների վրա տեղադրված վրաններում:
Էնիս Բերբերօղլուի դեմ դատական գործ էր հարուցվել «պետական գաղտնիք համարվող տեղեկությունները և փաստերը ռազմական ու քաղաքական լրտեսության նպատակով տարածելու» և «գյուլենականների խմբավորմանը գիտակցաբար և ցանկանալով օգնելու» մեղադրանքներով: Նշվում է, որ հենց նա էր տվյալներ տրամադրել «Ջումհուրիեթ»-ի նախկին գլխավոր խմբագիր Ջան Դյունդարին բեռնատարների վերաբերյալ: Հունիսի 14-ին նա դատապարտվել է 25 տարվա ազատազրկման ու կալանավորվել միանգամից դատարանի դահլիճում:
Cumhurriyet թերթի լրագրողները, այդ թվում և գլխավոր խմբագիր Ջան Դյունդարը ձերբակալել էին դեռևս 2015 թվականի նոյեմբերին նրա համար, որ վերջիններս հրապարակել էին աղմկահարույց մի հոդված այն մասին, թե ինչպես է Թուրքիայի Ազգային հետախուզական ծառայությունը բեռնատարներով զենք մատակարարում Սիրիայում գործող «Իսլամական պետություն»խմբավորման ահաբեկիչներին:
Դատարանը լրագրողներին մեղադրել էր պետական գաղտնիքներ հրապարակելու, լրտեսության և ահաբեկչական գաղտնի կառույցի անդամակցելու մեջ:
