Թեհրանը բողոք է հայտնել Իրանի վերաբերյալ Թիլերսոնի հայտարարության կապակցությամբ
Իրանի արտաքին գործերի նախարարությունը կանչել է Շվեյցարիայի դեսպանին, որը ներկայացնում է Թեհրանում Վաշինգտոնի շահերը, որպեսզի բողոք հայտնի Իրանի վերաբերյալ ԱՄՆ-ի պետքարտուղար Ռեքս Թիլերսոնի ելույթի առթիվ: Այդ մասին հայտնել է Թասնիմ գործակալությունը: Ավելի վաղ հաղորդվել է, որ հունիսի 14-ին Թիլերսոնը հայտարարել է, թե Իրանը «ձեռնարկում է քայլեր, որոնք հանգեցնում են տարածաշրջանի իրադրության ապակայունացման»:
Զանգվածային լրատվամիջոցների տվյալներով՝ Թիլերսոնը նաեւ նշել է, թե ԱՄՆ-ը «կաշխատի Իրանի ներսում աջակցել այն տարրերին, որոնք կբերեն խաղաղ իշխանափոխության»:
Իրանի արտգործնախարարության ներկայացուցիչ Բահրամ Քասեմին հայտարարել է, որ երկրի ԱԳ նախարարությունում Հյուսիսային եւ Հարավային Ամերիկայի գործերի գլխավոր տնօրեն Մոհամադ Քեշավարզ զադեն պաշտոնական գրավոր բողոք է հանձնել դեսպանորդին:
Քեշավարզ զադեն Թիլերսոնի խոսքը որակել է «չկշռադատված եւ բացահայտորեն Իրանի ներքին գործերին միջամտող», հաղորդել է ՌԻԱ Նովոստին:
