«ՀԱՊԿ-ի հավաքական ուժերն աշնանը վարժանքներ կանցկացնեն նոր ձևաչափով». Լուկաշենկո
Բելառուսն առաջարկում է ՀԱՊԿ-ի Օպերատիվ արձագանքման հավաքական ուժերի կազմավորումների համատեղ պատրաստության նոր, ավելի մաշտաբային ձեւ փորձարկել 2017 թվականի աշնանը կայանալիք օպերատիվ-ռազմավարական վարժանքների ընթացքում: Այդ մասին հայտնել է հանրապետության նախագահ Ալեքսանդր Լուկաշենկոն՝ Մինսկում ելույթ ունենալով կազմակերպության անդամ պետությունների պաշտպանական գերատեսչությունների ղեկավարների հետ կայացած հանդիպմանը:
«Բելառուսական կողմի նախաձեռնությամբ, ընթացիկ տարվա աշնանը պլանավորվում է փորձարկել ՀԱՊԿ-ի հավաքական ուժերի կազմավորումների համատեղ պատրաստության նոր, ավելի ընդգրկուն ձեւ՝ օպերատիվ ռազմավարական վարժանքներ, որոնց ընթացքում կգնահատվի շտաբների եւ զորքերի՝ համատեղ գործողություններ իրականացնելու պատրաստության մակարդակը»,-ասել է Լուկաշենկոն:
Նրա խոսքով՝ կարեւոր է ոչ միայն զորքերի գործողությունները փորձարկել հավաքական անվտանգության տարբեր տարածաշրջաններում, այլեւ մշակել ժամանակակից սպառնալիքների կանխմանն ուղղված գործողություններ, սպառնալիքներ, որոնք արդեն հիբրիդային ձեւեր են ստացել:
«Դրանք այսօրվա իրողություններն են եւ կազմակերպությունից պահանջում են համապատասխան արձագանք»,-նշել է պետության ղեկավարը:
Նաեւ Ալեքսանդր Լուկաշենկոն հորդորել է Հավաքական անվտանգության պայմանագրի կազմակերպության երկրներին՝ արագացնել Օպերատիվ արձագանքման հավաքական ուժերի համատեղ տեխնիկական ապահովման համաձայնագրի պատրաստումը:
«Դրա իրականացումը գործնական ուղղվածություն ունի եւ թույլ կտա հավաքական ուժերի գործողությունների ապահովման բազմաթիվ չկարգավորված հարցեր հանել ինչպես նրանց կողմից մարտական առաջադրանքներ կատարելիս, այնպես էլ ուսումնառության ընթացքում»,-ասել է Բելառուսի նախագահը, հաղորդել է ՏԱՍՍ-ը
