Օբաման Վաշինգտոնում 8 մլն դոլարով տուն է գնել՝ 8 ննջարաններով և 10 սանհանգույցներով. WP
ԱՄՆ-ի նախկին նախագահ Բարաք Օբաման եւ նրա տիկին Միշելը Վաշինգտոնում 8 միլիոն դոլարով ձեռք են բերել տուն, որը գտնվում է Քալորամայի շրջանում: Մայիսի 31-ին այս մասին հայտնել է Washington Post (WP) թերթը, որը վկայակոչում է անշարժ գույքի գործակալություններից մեկին։
Հրատարակության շարադրած տվյալների համաձայն՝ ընտանիքն այդ տունը վարձակալել էր Օբամայի նախագահական ժամկետի ավարտից հետո, իսկ այժմ որոշել է գնել այն: Թերթի տվյալներով՝ այն ունի ութ ննջարան եւ տասը սանհանգույց: Վաշինգտոնի հյուսիս արեւմուտքի Քալորամայի շրջանը քաղաքի հնագույն եւ ամենահեղինակավոր շրջաններից մեկն է:
Այդ շրջանում տարբեր ժամանակներում ապրել են ԱՄՆ-ի նախագահի պաշտոնում Օբամայի այնպիսի նախորդներ, ինչպիսիք են Վուդրո Վիլսոնը, Ուիլյամ Թաֆթը, Ֆրանկլին Ռուզվելտը, Ուորեն Հարդինգը եւ Հերբերտ Հուվերը, հաղորդել է ՏԱՍՍ-ը:
