Քաղաքային կայուն զարգացման ծրագիրը կարող է մեղմել մայրաքաղաքի տրանսպորտային կոլապսը. Գագիկ Մելիքյան
Այսօր Աժ նիստում ՀՀ կառավարության և Ասիական զարգացման բանկի «Քաղաքային կայուն զարգացման ներդրումային ծրագիր-Ծրագիր 2» վարկային համաձայնագրի քննարկումների ժամանակ ՀՀԿ խմբակցության քարտուղար Գագիկ Մելիքյանը համաձայնեց գործընկերների հետ, որ վարկային ծրագրի մասին խոսելուց պետք է արդյունավետությունից սկսել:
Սակայն, ըստ նրա, ցանկացած վարկային ծրագիր մինչև հաստատման ներկայացնելը երկարատև քննարկման փուլ է անցնում և նախապես գնահատվում է արդյունավետությունն ու ազդեցությունը մյուս ճյուղերի վրա:
«Այս ծրագիրն իր մուլտիպլիկատիվ էֆեկտով բավականին արդյունավետ ծրագիր կարող է դառնալ և արդյունավետորեն օգտագործվել ՀՀ տնտեսությունը զարգացնելու, աշխատատեղեր ապահովելու, սոցիալական վիճակի բարելավման առումով»,- ասաց Գ.Մելիքյանը՝ հավելելով, որ ծրագրի արդյունքում մայրաքաղաքում տրանսպորտային կոլապսը կարող է մեղմվել:
