ՔՊԿ-ն մարտահրավեր է նետում անզորության զգացողությանը. Նիկոլ Փաշինյան
«Սահմանադրական հանրաքվեից հետո հանրության մեծամասնությունը նորից հիասթափութուն է ապրում՝ լուծումների հասկանալի բանաձև չգտնելով»,- այսօր ԱԺ նիստում հայտարարությունների ժամին ասաց պատգամավոր Նիկոլ Փաշինյանը՝ Քաղաքացիական պայմանագիր կուսակցության անունից մարտահրավեր նետելով անզորության զգացողությանը:
Ըստ նրա՝ ՀՀԿ-ն իր շուրջն է համախմբել վարչական, ֆինանսական և նույնիսկ կրիմինալ ռեսուրսը և հսկողության տակ է առել ողջ իշխանությունը: Ն. Փաշինյանի կարծիքով՝ հարկավոր է փոխել ուժերի հարաբերակցությունը և ստեղծել քաղաքացիների մեծամասնության կամքն արտահայտող քաղաքական կառույց, որի համար անհրաժեշտ է 6000 գործունակ քաղաքացի, որ կարողանան ընտրատեղամասերում տեր կանգնել քվեներին, կառավարող թիմ, ՀՀ-ն ստեղծված ճգնաժամից հանելու հասկանալի և իրագործելի ծրագիր:
Ն. Փաշինյանը նշեց, որ ՔՊԿ-ն առաջանահերթություն է հռչակել այսպիսի ընդդիմության ձևավորումը՝ կոչ անելով ՀՀ քաղաքացիներին և սփյուռքին աջակցել իրեն այս ծրագիրն իրագործելու համար. «Հաղթանակը գործողություն է սպասում յուրաքանչյուրից»:
