Կալիֆոռնիայի հրաձգությունը եղել է ահաբեկչություն. Հետաքննությունների դաշնային բյուրո
Reuters-ի աղբյուրները պնդում են, որ կինը, ով ամուսնու հետ միասին Կալիֆոռնիա նահանգի Սան-Բեռնարդինո քաղաքի հաշմանդամների կենտրոնում կրակ էր բացել մարդկանց վրա, կարող է առնչություն ունենալ ԴԱԻՇ ահաբեկչական խմբավորմանը:
Ինչպես գրում է գործակալությունը, ԱՄՆ Հետաքննությունների դաշնային բյուրոն որակել է Սան-Բեռնարդինոյի հրաձգությունը, որին զոհ էր դարձել 14 մարդ, որպես ահաբեկչական գործողություն:
Հիշեցնենք, որ ամուսնական զույգի գործողությունների հետևանքով հրազենային վիրավորում է ստացել ևս 14 մարդ: Չարագործները կրակ էին բացել Սան-Բեռնարդինոյի սահմանափակ հնարավորություններով մարդկանց օգնության Inland շրջանային կենտրոնի սրահում, որտեղ այդ պահին կազմակերպվել է երեկույթ պետծառայողների համար:
Հարձակումն իրականացրել էին 28-ամյա Սաիդ Ֆարուկն ու 27-ամյա Տեշֆին Մալիկը: Նշենք, որ տղամարդն ու կինն սպանվել էին ոստիկանության կողմից:
The Washington Post-ի տվյալով՝ Սան-Բեռնարդինոյի հրաձգությունը դարձել է զենքի կիրառման 355-րդ դեպքն ԱՄՆ-ում՝ սկսած տարեսկզբից:
