Բրիտանական ռազմաօդային ուժերն սկսել են առաջին հարվածները հասցնել Սիրիայի ջիհադիստներին
Մեծ Բրիտանիայի թագավորական ռազմաօդային ուժերի կործանիչներն առաջին հարվածներն են հասցրել ԴԱԻՇ-ի ահաբեկիչների դիրքերին, հայտնում է BBC-ն՝ հղում կատարելով երկրի պաշտպանության նախարարությանը:
Tornado կործանիչ-ռմբակոծիչները երկինք են բարձրացել Կիպրոսի «Ակրոտիրի» ավիաբազայից այն բանից հետո, երբ բրիտանական խորհրդարանը պաշտոնապես հավանություն տվեց ռմբակոծմանը:
Նախօրեին Մեծ Բրիտանիայի խորհրդարանը ձայների մեծամասնությամբ քվեարկեց Սիրիայում ԴԱԻՇ-ի դիրքերին հարվածներ հասցնելու որոշման օգտին:
Նման որոշման օգտին կողմ էր քվեարկել խորհրդարանի 397 անդամ, դեմ՝ 223-ը: Մինչ քվեարկությունը բանավեճերը շարունակվել էին գրեթե 10 ժամ:
Բրիտանիան արդեն տարուց ավելի է, ինչ մասնակցում է Իրաքում ԴԱԻՇ-ի դեմ գործողություններին, սակայն վարչապետ Դևիդ Քեմերոնը հանդես էր գալիս օպերացիան Սիրիայի տարածքում ընդլայնելու օգտին:
