Ռուսաստանը երկրորդ ռազմաբազան է բացում Սիրիայում. ԶԼՄ-ներ
Քուվեյթի Al-Rai թերթը հայտնում է այն մասին, որ Ռուսաստանը նախապատրաստվում է երկրորդ ռազմաբազան բացել Սիրիայում: Հաղորդվում է, որ ՌԴ ռազմատիեզերական ուժերի խմբավորումը պետք է տեղակայվի Հոմսից 35 կմ հարավ-արևելք՝ «Շայրաթ» օդանավակայանում: Սիրայում ավիացիոն խմբավորման անձնակազմը կարող է հասնել մինչև 100 ինքնաթիռի:
Թերթի թղթակիցը, հղում կատարելով Դամասկոսում ռուս-սիրիա-իրաքյան համատեղ շտաբին, հայտնում է, որ «Շայրաթ» բազան ունի 45 ամրացված ավիացիոն անգար, որոնք թույլ են տալիս պաշտպանել ինքնաթիռները գնդակոծությունից:
Հոդվածագիրը գրում է, որ օդանավակայանն ի վիճակի է ընդունել ցանկացած տեսակի ինքնաթիռներ, ունի նաև հավելյալ թռիչքուղի:
Ինչպես Lenta.ru-ի թղթակցին հայտնել է ռուսական ուժային կառույցներում աղբյուրը, «Շայրաթ» ավիաբազայի օգտագործումը հարկավոր է Սիրիայի հարավում ու արևելքում օպերացիաների իրականացման համար:
