Միջուկային գործարքից կշահեն տարածաշրջանի բոլոր երկրները. Իրանի արտգործնախարար
Իրանի ու «վեցյակի» միջև միջուկային համաձայնագրի առավելություններից կշահեն տարածաշրջանի բոլոր երկրները: Այս մասին, հղում կատարելով Իրանի արտգործնախարար Մուհամմեդ Ջավադ Զարիֆին, հայտնում է իրանական Press TV հեռուստաալիքը:
«Տարածաշրջանի բոլոր երկրները, բարեկամ արաբական երկրները կօգտվեն այդ համաձայնագրի առավելություններից»,- ասել է Զարիֆը Բեյրութում Լիբանանի վարչապետ Թամամ Սալամի հետ հանդիպմանը:
Խոսելով Քուվեյթ, Քաթար ու Իրաք իր այցի մասին, որոնք իրականացվել են համաձայնագրի կնքումից անմիջապես հետո, նախարարն ընդգծել է, որ տարածաշրջանային երկխոսությունը ներկայում կարող է խաղալ կառուցողական դեր:
Նա նաև հայտնել է, որ Թեհրանը աջակցում է ներլիբանանյան երկխոսությանը՝ նշելով, որ միայն այդ եղանակով կարելի է լուծել երկրի քաղաքական խնդիրները:
Իր հերթին, Լիբանանի վարչապետը հայտարարել է, որ ողջունում է միջուկային համաձայնագիրը Իրանի ու «վեցյակի» միջև:
«Մենք պատրաստ ենք նոր էջ բացել Թեհրանի հետ երկկողմ հարաբերություններում միջուկային համաձայնագրից հետո»,- ընդգծել է Սալամը:
