Հասունացել է վճռական պահը, ժողովրդի համբերությունը սպառվել է. Զաքիր Հասանով
Ադրբեջանի պաշտպանության նախարար Զաքիր Հասանովն այսօր ստուգայց է կատարել առաջնագծում տեղակայված զորամասերից մեկում, հայտնում է Vesti.Az-ը՝ հղում կատարելով Ադրբեջանի պաշտպանության նախարարությանը:
Հանդիպումների ժամանակ Զաքիր Հասանովը հայտարարել է, որ նման կարգի պարբերական ստուգայցերը իրականացվում են երկրի նախագահ Իլհամ Ալիևի հրամանով:
«Այսօր Ադրբեջանն իր տնտեսական զարգացմամբ, ժողովրդագրական վիճակով, զինվորական պոտենցյալով ու մի շարք չափանիշներով անհամեմատելիորեն գերազանցում է Հայաստանին»,-հայտարարել է վերջինս:
«Մեր ժողովուրդը պետք է իմանա, որ ադրբեջանցի զինվորը չի պատկերացնում մեր երկիրը առանց Շուշիի, Լաչինի ու մյուս օկուպացված քաղաքների ու գյուղերի: Հենվելով միայն իր ուժի վրա՝ ադրբեջանցի զինվորը թշնամուն դուրս կշպրտի գրաված տարածքներից ու կվերականգնի իր տարածքային ամբողջականությունը: Ոչ ոք դրանում կասկած չպետք է ունենա»,- հայտարարել է Հասանովը:
Նրա խոսքով՝ Ադրբեջանի բանակը պատրաստ է վերականգնել երկրի «տարածքային ամբողջականությունը»: Նրա խոսքով՝ հասունացել է վճռական պահը, և ժողովուրդը, ում «համբերությունը սպառվել է, պահանջում է ազատագրել ադրբեջանական տարածքները»։
