Փակ աղջիկ էր, լիքը բան տարավ իր հետ. Ամուսնու կողմից սպանված կնոջ հարազատներ. news.am
Քանաքեռում առեղծվածային պայմաններում ամուսնու կողմից սպանված կինը՝ Հայկանուշ Սորսումաթյանը 2011թ Տավուշի մարզում սողանքի հետեւանքով զոհված եղբայրների քույրն է: Սորսումաթյանները մինչեւ օրս ապշած են տեղի ունեցածից եւ չեն կարողանում առանց արցունքների խոսել տեղի ունեցածի մասին:
Ընտանիքի անդամներից մեկը, ով չցանկացավ, որպեսզի իր անունը նշենք, NEWS.am-ի թղթակցի հետ զրույցում ասաց, որ դեռ շոկի մեջ են, չեն հասկանում, թե ինչու է այդպես եղել:
«Ինքը շատ փակ, լուռ աղջիկ էր: Կխոսեինք, կասեինք՝ ոնց ես, կասեր՝ լավ ենք ու վերջ, հեռախոսը ամուսինը լսում էր: Որ առիթ էր լինում, մեր տուն կարճ ժամանակով էր գալիս, մենակ չէինք կարող իրեն տեսնել, հանդիպել, զրուցել: Մենք էլ մտածում էինք, որ երեւի խիստ ամուսին է, դրա համար է այդպես, չէինք խառնվում, ասում էինք՝ ոչինչ, թող էդպես լինի, բայց իրենք հաշտ ապրեն: Հետո իմացանք, որ տղամարդը շատ է նեղություն տվել իրան, տնից միշտ ձայներ են լսվել, կինն էլ արդեն տուն էր վարձել, որ բաժանվեր: Չգիտենք, շատ փակ աղջիկ էր, լիքը բան տարավ իր հետ, որ մենակ իրան ու Աստծուն է հայտնի»,-պատմում է Սորսումաթյանների հարազատը:
Այժմ սպանված կնոջ եւ կալանքի տակ գտնվող ամուսնու երկու դուստրերն ապրում են թոշակառու պապի հետ: Սպանության գործով քննությունը դեռ ընթացքի մեջ է, տուժողի իրավահաջորդ է ճանաչվել եղբայրը, սակայն հարազատներին որեւէ մանրամասներ հայտնի չեն դեպքից: «Երեխեքին տարել է եկեղեցի, մոմ վառել տվել, թե չարերը պետք է հանեմ ձեր միջից: Աստվածաշունչը տվել է երեխայի իր ձեռքը, թե չարը պետք է հանեմ մեջիցդ: Տենց են պատմել մեզ: Մեկ էլ լուսադեմին մեծ աղջիկը զանգեց, թե եկեք մեր տուն, պապան մամային սպանել է: Կարի գործարանում է աշխատել, աղավնու պես աղջիկ էր, սիրուն, սպիտակ, բոյով, երեւի խանդն էլ է դեր խաղացել»,-պատմում են հարազատները՝ հավելելով, որ Հայկանուշը հավանաբար ոչինչ չի պատմել հարազատներին. որ ամուսինը հանկարծ իրենց վնաս չտա:
Ամբողջությամբ՝ սկզբնաղբյուր կայքում:
