Ադանայում զինված հարձակում է իրականացվել ոստիկանների վրա, կան զոհեր
Թուրքիայի Ադանա նահանգում ոստիկանության վարչության վրա զինված հարձակում է իրականացվել, հայտնում է APA-ն:
Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) զինյալները ցանկացել են ներխուժել ոստիկանական վարչություն, սակայն ոստիկանները դիմադրություն են ցույց տվել:
Հրաձգության հետևանքով 2 ոստիկան է սպանվել, հարձակում իրականացնողներից 2-ն սպանվել են, ևս 2 զինյալ կարողացել է հեռանալ դեպքի վայրից:
Սպանված զինյալներից մեկի մոտ պայթուցիկ սարք է հայտնաբերվել:
Հաղորդվում է, որ սպանվածը ցանկացել է սարքը գործի դնել ոստիկանական շենքի ներսում: Դեպքի վայր ժամանած մասնագետները վնասազերծել են պայթուցիկ սարքը:
