Չինաստանն ատոմակայաններ կկառուցի Իրանում
Չինաստանը երկու ատոմակայան կկառուցի Իրանի հարավում՝ Մակրան շրջանում, հայտարարել է Իրանի ատոմային էներգիայի կազմակերպության ղեկավար Ալի Աքբար Սալեհին:
«Մենք միաժամանակ ձեռնամուխ ենք լինում երկրում միանգամից 4 ատոմակայանների շինարարությանը հաջորդող երկու-երեք տարիներին: Ենթադրում ենք, որ նման մասշտաբային շինարարությանը կներգրավվի ավելի քան 20 հազար աշխատակից ու ինժեներ»,-ասել է նա:
Սալեհիի խոսքով՝ այսօրվա դրությամբ Իրանն ունի 90 տոննայի չափով «ծանր ջուր»:
«Մենք արդեն արտադրել ենք այդ նյութի բավարար քանակություն ու այլևս դրա կարիքը չունենք»,-նրա խոսքերը մեջբերել է ISNA գործակալությունը:
«Ինչ վերաբերում է ուրանի պահուստներին, ապա դրա պահոցներում կա 7-8 տոննա: Այդ պահուստների ճակատագիրը կորոշվի հաջորդող 4-5 ամիսներին»,-ասել է Սալեհին:
