Ստեփանակերտում կայացել է անվանի հայ լուսանկարչի ցուցահանդեսը
Նախօրեին՝ «Սահման» համահայկական փառատոնի շրջանակներում, «Ժայռ» համահայկական երիտասարդական միության և «Արցախի երիտասարդության զարգացման կենտրոն» ՀԿ նախաձեռնությամբ Ստեփանակերտի պատկերասրահում կայացել է անվանի հայ լուսանկարիչ Դամիան Հովհաննիսյանի լուսանկարների ցուցահանդեսը:
«Արցախպրես»-ի թղթակցի հետ զրույցում «Արցախի երիտասարդության զարգացման կենտրոն» ՀԿ նախագահ Սուսաննա Պետրոսյանը նշել է, որ այս փառատոնը, որի աշխատանքները սկսվել են ընթացիկ տարվա մարտ ամսից, ունի գրական-ստեղծագործական ուղղվածություն և անց է կացվում «Ազատության և անկախության սահմանը» թեմատիկ խորագրի ներքո:
«Փառատոնի նպատակն ազգերի միջև խաղաղության և բարեկամանական հարաբերությունների ամրապնդումն է, ինչպես նաև Արցախ-Հայաստան-Սփյուռք եռամիասնության կապի ամրապնդումը երիտասարդության շրջանում»,-նշել է Ս. Պետրոսյանը: Ս. Պետրոսյանի խոսքով՝ փառատոնին Արցախից մասնակցում են 5-12-րդ դասարանների 22 աշակերտ:
Ցուցահանդեսին ներկայացված էր Դամիան Հովհաննիսյանի անհատական լուսանկարները, որտեղ պատկերված են սահմանամերձ գյուղերում ապրող երեխաները:
Սեպտեմբերի 12-15-ը Սևանում Կիլիկիա նավի վրա տեղի կունենա փառատոնի եզրափակիչ փուլը, որին կմասնակցեն լավագույն աշակերտները «Ժայռ» համահայկական երիտասարդական միության նախագահ Ալեքսան Մինասյանը նշել է, որ միությունը ստեղծվել է 2001 թվականին, որի սկզբնական նպատակը եղել է ջրային սպորտի զարգացումը երիտասարդների շրջանում:
«Միությունը կազմակերպում է տարաբնույթ միջոցառումներ, որոնք միավորում են հայ երիտասարդներին»,-ասել է Ա. Մինասյանը և հավելել, որ ցուցահանդեսը կայացել է նաև Երևանում:
Արվեստասեր Լուսինե Թևոսյանը նշել է, որ հաճելի է Արցախում ականատեսը լինել նման ցուցահանդեսների:
«Լուսանկարներին նայելով հասկացա, որ հեղինակը շատ հետաքրքիր անձնավորություն է, և յուրաքանչյուր նկարի մեջ կա խորը բովանդակություն և իմաստ»,-ասել է Լ. Թևոսյանը և ավելացրել, որ յուրաքանչյուր նկարի մեջ հեղինակի հոգեվիճակն է պատկերված:
Փառատոնի ամենամյա գլխավոր աջակիցն է ՀՀ պաշտպանության նախարարությունը և սպորտի և երիտասարդության նախարարությունը:
Ցուցահանդեսին ներկա էին նաև ԼՂՀ մշակույթի և երիտասրդության հարցերի նախարարության աշխատակիցներ և արվեստասեր հասարակությունը:
