Կարար մի քանի հոգու գլուխ ջարդվեր՝ մի քանի ապակի ջարդվեց. Սյունիքի մարզպետի թիկնապահը իր կազմակերպած ինքնադատաստանի մասին. «Հրապարակ»
«Հրապարակ» թերթը գրում է. «Սյունիքում վենդետայի ալիք է բարձրացել: Երեկ հայտնի դարձավ, որ Սյունիքի մարզպետի դեմ մահափորձի գործով մեղադրյալ Գարեն Աթաջանյանի որդու՝ Մհեր Աթաջանյանի Կապան քաղաքի Հունան Ավետիսյան 1 հասցեում գտնվող խանութի վրա հարձակում է տեղի ունեցել, կոտրվել են խանութի ապակիներն ու դռները: Հարձակումը կազմակերպել է Սուրիկ Խաչատրյանի՝ Լիսկայի թիկնապահ հայտնի Զարզանդ Նիկողոսյանը, ով պարբերաբար հայտնվում է իրավապահների տեսադաշտում, բայց հմտորեն ամեն անգամ խուսափում է պատժից:
– Բա ըտենց բան կարելի՞ էր անել, որ մանավանդ իրան, իրա ընտանիքին էդքան լավություններ ա արել, չի կարելի, չէ:
– Բայց նրա մեղքը դեռ ապացուցված չէ:
– Դե, ժամանակի խնդիր ա:
– Հիմա Դուք հաշվեհարդար եք տեսնում, օրենքից վե՞ր եք Ձեզ դասում:
– Բա կարելի՞ էր նման բան անել:
– Իսկ ինչո՞ւ պետք է Գարեն Աթաջանյանը ցանկանար սպանել Խաչատրյանին, Եթե, Ձեր ասելով՝ այդքան լավություն է արել:
– Ես չգիտեմ, չեմ կարող ասել: Հետաքննությունը կպարզի:
– Իսկ ի՞նչ կասեք Արա Բուդաղյանի մասին, նա ի՞նչ կապ ունի:
– Եթե ընդեղ են, ուրեմն կապ ունեն, բա ինչի Ձեզ չեն տանում ԱԱԾ, եթե մասնակից չլինի, ընդեղ նստած չի լինի:
– Բա սկզբում էլ ոմանք ասում էին, որ հենց Սուրիկ Խաչատրյանն է իր դեմ մահափորձ կազմակերպել:
– Էէէ, մի ապուշ մի բան է ասել, երկու կիսախելագար էլ ընգել են դրա հետեւից: Հենա՝ կամաց-կամաց պարզվում է սաղ:
– Ճնշումներ չե՞ն գործադրվել իր վրա, հիմա Ձեր արարքը ճնշում չէ՞։
– Ազիզ ջան, էդ բանը, իմ արածը ցանկացած ղափանցի կարար աներ, որտև ինչ որ էդ Գարին ա արել, ինքն իրա արածով ղափանցու անունի վրա մեծ բիծ ա թողել: Էսօր ղափանցիք ուղղակի ամաչում են, որ էդ գործին առնչվող մարդը ղափանցի ա:
– Իսկ հետաքրքիր է՝ բավարարվելու եք միայն խանութների ապակիներ կոտրելով, թե՞ այլ միջոցներ էլ եք ձեռնարկելու:
– Դե, կարար մի քանի հոգու գլուխ ջարդվեր՝ մի քանի ապակի ջարդվեց, բավարարվել եմ դրանով:
Ամբողջությամբ կարդացեք «Հրապարակի» այսօրվա համարում։
