Թուրքիայում կքննարկեն Սիրիա ներխուժելու հարցը

Թուրքական գեներալները կքննարկեն Սիրիա ներխուժելու նախապատրաստման հարցը:

Թուրքիայի մայրաքաղաք Անկարայում տեղի կունենա թուրք-սիրիական սահմանին տեղակայված զորքերի հրամանատարների հանդիպում, որի ժամանակ կքննարկվի Սիրիա ռազմական ներխուժման հարցը: Այս մասին հայտնում է թուրքական Hurriyet թերթը:

Նշված հանդիպմանը ներկա են լինելու տանկային և մոտոհրաձգային ստորաբաժանումների, ինչպես նաև հատուկ նշանակության ջոկատների հրամանատարները:

Հարցերից մեկը լինելու է ռազմական հնարավոր ներխուժման հրամանատարի նշանակումը: Այս պահին Թուրքիան Սիրիայի սահմանին տեղակայել է թվով 54 հազար զինվոր, որը կազմում է երկրի ցամաքային զորքերի 15 տոկոսը:

Հուլիսի 3-ին Թուրքիայի վարչապետ Ահմեդ Դավութօղլուն հայտնել է, որ Անկարան վերջին մի քանի օրում Սիրիայի սահմանին ավելացրել է ռազմական կոնտինգենտը` ներառած հատուկ նշանակության ջոկատները և ռազմական տեխնիկան:

Թուրքիայի և Սիրիայի միջև կոնֆլիկտը սկսվել է 2012թ. հոկտեմբերի 3-ին, երբ թուրքական կողմը կրակ էր բացել դեպի Սիրիայի տարածք, ի պատասխան՝ սահմանին տեղի ունեցած միջադեպի, որտեղ հրանոթային արկի պայթյունի հետևանքով զոհվել էր 5 մարդ:

Համաշխարհային հասարակայնությունը դատապարտեց միջադեպը և կոչ արեց թույլ չտալ կոնֆլիկտի ծավալմանը:

Անցած աշնանը Սիրիայում հայտարարեցին, որ յուրաքանչյուր թուրքական ներխուժում սիրիական տարածք կգնահատվի` որպես սուվերենության խախտում և ագրեսիայի դրսևորում:

Պատրաստեց Անի Գաբուզյանը