Ինչու են համընկնում ընտրողների անունները, ազգանուններն ու մյուս տվյալները. Ոստիկանության պարզաբանումը
ՀՀ Ոստիկանությունը պարզաբանում է ներկայացրել ընտրողների ռեգիստրում ընդգրկված այն քաղաքացիների ընդհանուր թվի վերաբերյալ, որոնց անունը, ազգանունը, հայրանունը, ծննդյան օրը, ամիսը, տարեթիվը համընկնում են։ Հաղորդագրությունը ներրկայացնում ենք ստորև։
«www.hetq.am» համացանցային կայքի 2013 թ. փետրվարի 13-ի «Հայտնաբերվել են կրկնակի գրանցում ունեցող բազմաթիվ ընտրողներ» հրապարակման համաձայն՝ հայտնաբերվել են 104 անձանց տվյալներ, ովքեր ընտրական ցուցակում կրկնակի են ընդգրկված:
Ընտրողների ցուցակներում միևնույն անձի անհատական տվյալները կրկնակի ընդգրկված լինելու վերաբերյալ տեղեկատվությունը չի համապատասխանում իրականությանը:
Այս պահի դրությամբ բնակչության պետական ռեգիստրում առկա տվյալների համաձայն գոյություն ունեն ոչ թե 104, այլ 111 անհատական տվյալների համընկումով 222 ընտրողներ, որոնք տարբեր անձինք են:
Հիշեցնում ենք, որ ՀՀ ոստիկանությունը ՀՀ Ազգային ժողովի ընտրությունների ժամանակահատվածում պարբերաբար տեղեկատվություն է տարածել բնակչության պետական ռեգիստրում նույն անհատական տվյալներով տարբեր անձանց առկայության վերաբերյալ:
Կից ներկայացվում է միևնույն անհատական տվյալներ ունեցող (անուն, ազգանուն, հայրանուն, ծննդյան օր, ամիս, տարեթիվ) անձանց ցանկը: Ցանկում առկա են ոչ միայն «www.hetq.am» կայքում հրապարակված, այլև ոստիկանությունում առկա լրացուցիչ տվյալներ:
