Հայ Առաքելական եկեղեցին հավաքում է բոլոր իր սպասավորների անձնագրերի պատճենները. մամուլ
«Հայկական Ժամանակ» օրաթերթը գրում է. «Երեկ հավաստի աղբյուրից տեղեկություն ստացանք, որ Հայ Առաքելական եկեղեցին հավաքում է բոլոր իր սպասավորների անձնագրերի պատճենները։ Պաշտոնապես դա բացատրել են նրանով, թե աշխատավարձը պետք է դարձնեն բանկային քարտով։
Անձնագրերի պատճենների հավաքագրումը սկսվել է Ն.Ս.Օ.Տ.Տ Գարեգին Բ-ի՝ նախանցած շաբաթ Արարատյան թեմի առաջնորդարան կատարած այցից հետո։ Նա բավական երկարատև մի ժողով է անցկացրել, և մեր ունեցած տեղեկություններով, խոսել է նաև նախընտրական թեմաներով, մասնավորապես, առաջիկա ընտրություններին «ակտիվ մասնակցություն» ապահովելու անհրաժեշտության մասին։
Ըստ մեր աղբյուրների, անձնագրերի պատճեները հավաքվելու են ամբողջ հանրապետությունով մեկ սփռված եկեղեցական ենթակայության կառույցներից, այդ թվում՝ էջմիածնի և Սևանի ճեմարանների սաներից։ Գործի գլխավոր պատասխանատու է նշանակվել Արարատյան թեմի առաջնորդական փոխանորդ Տ. Նավասարդ արքեպիսկոպոս Կճոյանը։ Այս տեղեկությունների շուրջ Հայ Առաքելական եկեղեցու լրատվության պատասխանատուներից մեկնաբանություն ստանալու մեր փորձերն անցան ապարդյուն»։
