«Շանգրի Լա» խաղատան դիմաց մերկասառույցի պատճառով բախվել են 40-ից ավելի ավտոմեքենաներ
Այսօր՝ փետրվարի 8-ին, խոշոր ավտովթար է տեղի ունեցել Կոտայքի մարզում։ Ժամը 08։00-ի սահմաններում մերկասառույցի պատճառով Երևան-Սևան ավտոճանապարհի` «Շանգրի Լա» խաղատան դիմացից մինչև Արծիվի արձան ընկած տարածությունում, բախվել են 40-ից ավելի տրանսպորտային միջոցներ։ Այս մասին հաղորդում է shamshyan.com կայքը:
Ինչպես վթարի վայրից հայտնում է ֆոտոլրագրող Գագիկ Շամշյանը, նշված հատվածում երթևեկությունը ճանապարհային ոստիկանության 2-րդ սպայական գումարտակի աշխատակիցների կողմից դադարեցվել է։ Դեպքի վայր են ժամանել մի քանի ապահովագրական ընկերությունների ներկայացուցիչներ։
Նշվում է, որ վթարվել են «Լեքսուս», «ԲՄՎ» «Մերսեդես»,«Վազ 2121», շտապօգնության և մի քանի այլ մանկինշի ավտոմեքենաներ։ Վթարի հետևանքով, այս պահի տվյալներով, զոհեր և վիրավորներ չկան։
Ֆոտոլրագրողը հայտնում է, որ առավոտից ճանշինի պատասխանատուները ոչ մի աշխատանք չեն կատարել մերկասառույցը վերացնելու համար։ Ճանապարհին չի լցվել ո՛չ աղ, ո՛չ ավազ։
