Մոսկվան բոլոր երկրներին կոչ է արել Կիևից տարհանել դիվանագետներին՝ հնարավոր հարվածներից առաջ
Ռուսաստանի արտաքին գործերի նախարարությունում հավատարմագրված բոլոր օտարերկրյա դիվանագիտական առաքելություններին և միջազգային կազմակերպությունների ներկայացուցչություններին ուղարկվել է նոտա՝ կոչ անելով Կիևից նախապես տարհանել դիվանագիտական առաքելությունների անձնակազմին։ Այս մասին ասվում է Ռուսաստանի ԱԳՆ խոսնակ Մարիա Զախարովայի հայտարարության մեջ, որը տարածել է «Ինտերֆաքս»-ը։
«2026 թ. մայիսի 4-ին Ռուսաստանի պաշտպանության նախարարությունը պաշտոնական հայտարարություն է տարածել Կիևի ռեժիմի կողմից Մոսկվային հարվածելու սպառնալիքների վերաբերյալ՝ բոլոր ռուսաստանցիների համար սուրբ տոնի՝ Հայրենական մեծ պատերազմում Հաղթանակի օրը։ Ռուսաստանի ԱԳՆ-ն խստորեն կոչ է անում ձեր երկրի իշխանություններին/ձեր կազմակերպության ղեկավարությանն այս հայտարարությանը վերաբերվել առավելագույն պատասխանատվությամբ և ապահովել Կիևից դիվանագիտական և այլ ներկայացուցչությունների անձնակազմերի, ինչպես նաև քաղաքացիների ժամանակին տարհանումը՝ հաշվի առնելով Ռուսաստանի զինված ուժերի կողմից Կիևի, այդ թվում՝ որոշումների կայացման կենտրոնների դեմ պատասխան հարվածի անխուսափելիությունը, եթե Կիևի ռեժիմը Հաղթանակի օրվա տոնակատարությունների ժամանակ իրականացնի իր հանցավոր ահաբեկչական ծրագրերը», – ասվում է հայտարարության մեջ։
Նա հավելել է, որ արտերկրում Ռուսաստանի դիվանագիտական առաքելություններն այս մասին կտեղեկացնեն հավատարմագրման երկրներին և միջազգային կազմակերպություններին։
Զախարովան նշել է, որ մայիսի 4-ին Երևանում Եվրոպական քաղաքական համայնքի գագաթնաժողովի ընթացքում Ուկրաինայի նախագահ Վոլոդիմիր Զելենսկին «թույլ տվեց իրեն անել ագրեսիվ և սպառնալից հայտարարություններ Մոսկվայում Հաղթանակի օրվա սուրբ տոնը ահաբեկչական հարձակումներով խաթարելու իր մտադրության մասին», և հենց այդ նույն Ռուսաստանի պաշտպանության նախարարությունը նախազգուշացում տարածեց՝ ի պատասխան Զելենսկու «ագրեսիվ մտադրությունների»:
«Ընդգծում եմ՝ դա արվել է հենց որպես պատասխան միջոց։ Եթե ԵՄ երկրները կարծում են, որ կարող են «խլացնել» հանրային կերպով հնչեցված սպառնալիքները, այսպես ասած՝ «գորգի տակ թաքցնել» Զելենսկու ագրեսիվ հայտարարությունները, ապա նրանք չարաչար սխալվում են», – նշել է Զախարովան՝ հավելելով, որ Արևմուտքը ոչնչացնում է խորհրդային ժառանգությունը, խեղաթյուրում պատմությունը:
Տվյալ դեպքում, Զախարովայի խոսքով, արևմտյան քաղաքական գործիչները չպետք է կորցնեն իրենց ինքնապահպանման բնազդը։
«Մենք հանդես չենք գալիս ագրեսիայի դիրքերից, մենք հանդես ենք գալիս ագրեսիային անխուսափելի պատասխանի դիրքերից։ Հենց այսպես էլ պետք է դիտարկել Ռուսաստանի պաշտպանության նախարարության մայիսի 4-ի հայտարարությունը և մեր հետագա քայլերը։ Այն, անշուշտ, չպետք է անտեսվի։ Դրան պետք է վերաբերվել ամենայն լրջությամբ», – ընդգծել է ՌԴ ԱԳՆ խոսնակը։
Մայիսի 4-ին Զելենսկին հայտարարել էր, որ Ռուսաստանը մայիսի 9-ին տարիների ընթացքում առաջին անգամ շքերթ կանցկացնի առանց ռազմական տեխնիկայի, քանի որ վախենում է, որ Կարմիր հրապարակի վրայով կարող են անօդաչուներ թռչել։
