Թուրքիայի արտգործնախարարը ՀԱՄԱՍ-ի հետ քննարկել է Գազայի խաղաղության ծրագրի երկրորդ փուլը
Թուրքիայի արտգործնախարար Հաքան Ֆիդանը Անկարայում բանակցություններ է վարել պաղեստինյան ՀԱՄԱՍ-ի պատվիրակության հետ, որը գլխավորել է քաղբյուրոյի անդամ Խալիլ ալ-Հեյյան: Հանդիպման հիմնական թեման Գազայի հատվածում հրադադարի համաձայնագրի երկրորդ փուլի իրականացումն էր, հաղորդում է Haberturk հեռուստաալիքը՝ հղում անելով Թուրքիայի ԱԳՆ աղբյուրներին:
Նախորդ օրը ՀԱՄԱՍ-ի ներկայացուցիչները հանդիպել են նաև Թուրքիայի Ազգային հետախուզական կազմակերպության ղեկավար Իբրահիմ Քալընի հետ: Կողմերը քննարկել են Անկարայի միջնորդական դերը հակամարտության կարգավորման գործում, ինչպես նաև Պաղեստինի Գազայի կառավարման կոմիտեի գործունեությանը վերաբերող հարցեր:
2025 թվականի հոկտեմբերի 9-ին Իսրայելը և ՀԱՄԱՍ-ը, Եգիպտոսի, Կատարի, ԱՄՆ-ի և Թուրքիայի միջնորդությամբ, համաձայնել են գործարկել ԱՄՆ նախագահ Դոնալդ Թրամփի կողմից առաջարկված Գազայի խաղաղության ծրագրի առաջին փուլը: Հաջորդ օրը Գազայի հատվածում ուժի մեջ մտավ հրադադարը, և իսրայելական զորքերը նահանջեցին այսպես կոչված «Դեղին գիծ»՝ պահպանելով վերահսկողությունը անկլավի տարածքի կեսից ավելիի նկատմամբ:
Համաձայնագրի երկրորդ փուլը նախատեսում է իսրայելական ուժերի դուրսբերում Գազայից, միջազգային կայունացման ուժերի տեղակայում և անկլավի կառավարող մարմինների, դրանց թվում՝ Խաղաղության խորհրդի աշխատանքների մեկնարկ։
