Թուրքիայի իշխանությունները սատարել և սատարում են ՀՀ դե-ֆակտո իշխանություններին՝ պահպանելու իրենց աթոռը. Ղարամյան
Հայաստանի դե-ֆակտո վարչապետի փարիսեցիական հայտարարությունները հայ-ռուսական «աննախադեպ» հարաբերությունների մասին իրենց տխրահռչակ ավարտին հասան նշված անձի՝ իտալական «La Reppublica» պարբերականին տրված հարցազրույցով։ Այս մասին Facebook-ի իր էջում գրել է Արցախի ԱԱԾ նախկին ղեկավար Արշավիր Ղարամյանը:
Նա նաեւ նշել է. «Դա իրենց վարած հակառուսական պատերազմի հրետանային նախապատրաստությունն էր, որից հաջորդեց դե-ֆակտո հանրային հեռուստատեսությամբ հակառուսական «հետևակի» գրոհը, իսկ այս ամենի բարձրակետը եղավ մի ինքնակոչ «ՆԱՏՕ-ական պաշտոնյայի» հրապարակավ կոչ հրավերը՝ «Նիկոլ Փաշինյա՛ն, կոչ եմ անում Հայաստանին անդամակցել ՆԱՏՕ-ին: ԱՄՆ նախագահ, պահպանե՛ք Հայաստանը»։
Սա ՆԱՏՕ-ի և վերջինիս հանգուցային խաղացող Թուրքիայի կողմից ՀՀ դե-ֆակտո իշխանությունների ձեռքով Ռուսաստանին և Իրանին տարածաշրջանից քշելու, տարածաշրջանն ամբողջությամբ թուրքական «աութսորսի» հանձնելու մեծ ռազմագործողության հերթական արարն է, որ արագ տեմպերով մոտենում է վերջնանպատակին՝ Արցախի համար նշանակելով վերջնական կործանում, իսկ Հայաստանի համար՝ «կործանումից հինգ պակաս»։ Սրանով պարզ է դառնում այն ողջ ջանասիրությունը, որով Թուրքիայի իշխանությունները սատարել և սատարում են ՀՀ դե-ֆակտո իշխանություններին՝ պահպանելու իրենց աթոռը»։
